金融High Tea 2013年1月10日
金融High Tea——有骨落地
2013年1月10日
■內房股去年熱炒，原來九倉主席吳光正(右)買內房股都賺到笑。
港股調整幾日後又彈一彈，上升板塊都唔少，股民運氣不差的話，好多都有骨落地，執番多少。中資金融股係炒內地可能減低存款準備金的傳言下，全線收高，半新股的人保勁升7%，仲創咗上市後新高，捧場客呢舖認真飲得杯落。
論到表現最標青的國企指數股係龍源(916)及比亞迪(1211)，齊齊大漲超過9%。龍源電力公佈最新發電量資料，去年12月集團完成發電量294萬兆瓦時，按年增長近26%，其中風電增長近35%，火電增長11%。集團由2012年5月配股開始計，跑輸大市20%，至去年11月底才開始狂追，約一個月時間就抽升33%。大行摩通認為原因係12月配股完成，不利因素已經反映，預料未來風電場利用率對龍源有正面影響。
摩通預計未來半年中央將實施可再生能源配額制，這將令電網公司採用更多可再生能源，特別是風力發電，對風電場營運商屬正面因素。另外，由新疆到西北電網的長途輸電線路完成，將增加新疆的跨省送電能力至5吉瓦(GW)，以及減輕省內電網擠塞問題。
最後係風電行業的新投資去年下降超過23%，現有的風電市場面對競爭減少。該行上調龍源今年盈利預測5至10%，目標價由5.5元上調至6.6元。評級由「中性」上調至「增持」。龍源昨日爆升，及時上車者乜仇都報晒，風電股一齊炒上，金風科技(2208)及大唐新能源(1798)齊漲超過7%，中國高速傳動(658)勁抽一成一！
龍源報復式上升
中港地產股繼續齊齊領跑。恒生地產分類指數升2%，結果帶動恒指重越23200收市，收報23218，升107點；國企指數收報11817，升103點，成交金額縮減至754.7億元，暫時仲唔可以肯定整固完成。
本地地產股表現好的有恒地(012)及新地(016)，升超過2%，仲有信置(083)升超過3%。內房股相對就炒得癲好多，幾隻此前被大行唱好的內房股繼續喪炒，五礦建設(230)、中渝地產(1224)炒高7%、沿海家園抽高近12%，以發展上海及廣州物業的星獅地產(535)勁癲，飆高15%，八個交易日內暴升近六成至昨日的0.66元。
內房股大贏家是誰？
內房股仍然熱鬧，多隻股份創出新高。講起內房股，中環茶友問，知唔知邊個係買內房股的大贏家。講真，近年本地有錢人好多都抽注內地房地產，要講名單好長，座中人各舉例子，茶友聽完一輪，就話大家所提嘅富豪都啱，他心中大贏家之一，應該係九倉集團主席吳光正。
茶友話，早排同係九倉打工之老友食飯，講起佢老闆政運亨通，老友笑言呢輪九倉行正大運，佢老闆過去一年密食內房股，隻隻賺到笑。聽完呢番話，茶友翻查資料，九倉去年入股綠城中國，同時仲買入不少內房股，呢啲股份好多都變成去年的翻身王，股價倍數上升。
過去，九倉係成份股中的弱勢份子，經常跑輸大市，升到佢個市就差不多玩完，但去年該股走勢明顯轉強，好多人都無留意，有人見到佢升，仲驚咗個市係咪見頂呢？茶友話，照咁睇九倉基本因素已經變咗，唔單止係隻收租股，仲係半隻內房股，所以內房股板塊有郁動，佢通常都會跟升，連帶同系的會德豐(020)同海港企業(051)都有呢個現象出現。
陸羽仁
上一頁 下一頁
金融High Tea 舊文