金融High Tea 2013年1月21日
金融High Tea——淡市投資 旺市炒作
2013年1月21日
港股上周五上升，主要受中國公佈利好經濟數據帶動，內地第四季經濟增長7.9%，全年為7.8%，並預期未來有7至8%增長。恒指收報23601點，升262點，升幅1.1%，未如內地升1.4%那樣多，不過港股在內地跌時跟唔足，升時無跟足亦都合理。
外界對中國經濟數據普遍睇好，評級機構穆迪話，內地第四季經濟增長7.9%，顯示內地的投資周期又重新啟動，佢認為今次的中國經濟復甦可維持至今年上半年，但下半年的增速將轉趨溫和，今年的經濟增長水平將與去年相近，因為北京中央會致力防止過度借貸以及通脹過高。
匯豐估得樂觀少少，匯豐大中華區首席經濟師屈宏斌話，中國去年第四季經濟增長數據顯示，中國經濟已見底回升，有關態勢今年可以持續，維持今年內地全年經濟增長8.6%的預期，超過市場平均估計的8.1%，但指今次的經濟復甦較為溫和，並非2009年的「V形」復甦，故認為今年內地沒有通脹壓力，人行仍有空間推行寬鬆的貨幣政策，但佢改變早前認為今年內地會減息0.25厘的預計，估計息口將保持不變，而人民銀行今年將再下調存款準備金率100個點子。
上周五的五大成交股份中有四隻係紅色股，主要係銀行股，包括建設銀行(939)升1.5%，收報6.63元；中國銀行(3988)升2.5%，收報3.77元；工商銀行(1398)升1.7%．收報5.94元；中國移動(941)升1.2%，收報87.65元。銀行股升，理由好簡單，中國數據愈好，愈唔使驚內銀執笠，就顯得佢哋十分便宜，好似建行升咗咁多，?家都係7.9倍市盈率，4.4厘息率，即使話內地銀行業逐步開放，內銀未來只有單位數字盈利增長，呢啲市盈率都仲係便宜，預計外資會繼續買入紅色股。
估上半年好過下半年
唔知大家記唔記得，去年年頭，雖然大家都預年初經濟會放緩，但好多人都預計到下半年經濟會見底回升，但內地緊縮的情況比預期長，要遲至第4季才復甦，結果國企指數要等到9月才見底(真係預期第4季復甦就反彈)，而內地上綜指更要遲至去年12月才見底。
今年情況剛好和去年調轉，市場共識係中國經濟上半年增長較快，下半年較慢，若經濟走勢如市場所料，股市在上半年衝上高位後，回氣後下半年再升，都唔易破上半年高位。但如果內地經濟出乎市場預計地好，例如第3季、甚至第4季都無放慢，咁股市下半年升勢就會較高。你知呢啲嘢都係估估吓，無人說得準。
我在去年9月、10月係咁叫人買國企或內地指數基金，有個朋友聽咗我講，買咗恒生H股指數基金(2828)、越秀產託(405)同埋一些中國基金，而家好多升咗20%以上，佢上周五打電話來，話「最衰當時唔敢買得多，買唔夠，好唔好加注？」
跌市恐慌 好難入市
我呢個朋友賣咗樓套現咗大筆資金，但係唔想作風險投資，所以較大部份存人仔，只用三分一買股票，所以我當日都唔敢建議佢買一啲升可以升五成、跌可以跌一半的股票，都係叫佢買啲收息股(如405)或指數股(如2828)，但係佢當日都唔敢買夠佢想買的金額，皆因去年9月、10月時氣氛的確好淡，所以無信心買足亦好正常。既然佢持股比例唔高，我抱着「溝上唔溝落」的精神，話佢不妨等回吐少少時加注，反而佢賺價較深，拉番平均入貨價都唔貴，記住若回到平均入貨價要止賺就得，同埋若升到較多時，就最先將後加者減持部份套利。
同朋友講完，我又諗到一個點子，我經常講要分開「投資的我」和「投機的我」，諗深一層，應該「淡市投資，旺市炒作」。
底部橫行 大盤入市
「投資的我」一年等幾個機會，吼啱時候，低位入市，至少坐半年一年，唔使經常進出。「投機的我」進出的次數多好多，散戶投機以買股為主，市唔旺好難投機。在去年9、10月市況差的時候，是「投資的我」入場低撈的好時機，當然撈也睇你撈乜貨，要撈有質素的貨色，買國企指數基金可說是低撈優質貨色的典型。上述的朋友買樓套現大筆資金，當中大部份會做人仔定期，其餘想買較穩陣的股票，當時我叫佢買恒指H股指數基金和越秀產託，前者價格低，有增長空間，後者派息高，等如買樓收租，不過有人代你管理唔使煩。
2828去年9月見底造91.7元，整個9、10月都在90幾元的低位徘徊，當時2828已是第三次試底，佢在5月時先低見93.75元，7月再試92.85元，到9月再見最低位91.7元。時光倒流，如果你在5月時在94、95元買咗2828，跟住見佢跌到到91個幾，散戶會好心慌，特別係在當時講到中國經濟會崩潰、內銀會執笠的環境下，心慌好正常。所以我在90幾元時叫朋友買2828，佢有買，不過買唔齊，就係受呢種環境氣氛影響。
但你睇吓?家幾錢？121元，在100元以下買，全部賺20%以上，夠膽在近低位買，可以賺30%！愈是恐慌的時候，愈係「投資的我」應該入市的時候，而且買得夠低，根本就可以坐較長時間，不用賺幾格就即閃。朋友話「最衰當時唔敢買得多」，就係呢種唔敢買股的時候，正是股票大平賣的時候。點解2828在5月、7月、9月都跌到91至93元就停，出現三底？就因為一跌到這些位置時，就有大量買盤入市，令股份跌唔得太低，唔會跌多20、30元。只有強者夠膽在低位買，而唔係在高位搶。要記住每年都有一、兩個低位，睇得通在這些位置入市，要賺20%以上唔難。比較安全唔係在第一次試底即買，係在第二次試底唔係好跌得穿上次低位才買，即係去年7月時，因為股票在下跌中時，可以一級比一級低，但見到第二次試底都無大力跌穿時，證明有一訂購買力支持，所以可以在第二底試底唔穿時入市。
高位買貨 止蝕要緊
講完投資講投機，在去年第二、三季，股市反覆下跌，若散戶投機以買股為主，在這種環境下，好易買乜輸乜，唔易搵食，市淡不利投機(以沽空為主的例外)。到去年第四季到今年年頭，市況轉旺，投機的市況出現。投機炒股，有人興順住強勢股炒上，有人興博大插股反彈，我覺得順住炒強勢股炒易少少，在旺市中，例如這個市主要炒中國經濟轉勢，在紅色股回吐時買入搭一搭順風車，搭幾個站落車，唔係太難。
無人知旺市持續幾耐，好似音樂椅咁，可以放好長，可以好快停，愈係多人買股，愈係多人賺錢，就愈近音樂停的時候。所以在股市升咗一段才入市，同好低位入市不同，在旺市買股，投機易過投資，因為投資心態偏長，未必會止蝕，若在較高位入貨，回落就要捱價，買咗有質素的股份如指數股易啲捱，買着雞股唔值得捱。在這些市道買股，可以有一定投機心態，要止蝕、要食胡。明知買入價唔係咁平，唔好諗住一定要同股份做人世，若然升得多，可以先食胡，若然買完跌，要定位止蝕，咁就可以順住大市升勢玩下去。
陸羽仁
上一頁 下一頁
金融High Tea 舊文