陸羽仁 BLOG 2013年3月22日
經濟隱憂
2013/3/22 8:24:2
網誌分類: 經濟
美股獲利回吐，杜指跌90點，表面上是怕塞蒲路斯有事，其實暗藏對全球經濟前景的擔憂。
美國的消息主要利好。國會眾議院昨日以大比數通過批准一項為聯邦政府提供額外的運營資金至9月30日的法案，免除了政府部門因缺錢而關門，白宮及國會因此多了半年時間去解決削支的爭議。另外，美國最新一周首次申領失業救濟人數33.6萬，好過市場預期，而3月費城聯儲製造業指數由上月的負12.5點，大幅跳升至正2點，亦遠好過市場預期的負1.5點。另外，美國2月份先行經濟指標指數較上月增0.5%，也好過預期的0.4%。
房市方面，2月的二手房銷量以年度計為498萬幢，差過市場預期的501萬幢，但仍好過上月的492萬幢，反映美國房市繼續復甦。
不過，如此多的利好消息，仍然敵不過來自歐洲的壞消息影響，投資者借勢獲利回吐，杜指下跌90點，收14421點，標普500指數跌13點，造1546點，完全抹去了上日升幅有突。
德國3月份採購經理人指數意外下跌至48.9，創了三個月低位，反映德國製造業已經陷入了萎縮，德國係歐元區最大最強經濟體，引發了投資者對歐元區經濟前景的擔憂。另外，塞蒲路斯問題繼續發酵，歐洲「三頭馬車」(歐盟、歐洲央行、IMF)昨日重申，賽浦路斯如果在下週一之前仍未能推出適當的措施，籌集到58億歐元，它們將停止向賽浦路斯提供特別援助資金，態度變得比前強硬。投資者恐慌情緒大增，歐洲股市亦即時腳軟，其中法國股市跌1.4%，德國跌0.9%。
賽浦路斯危機會有四個發展可能性。一、由俄羅斯出手拯救。《華爾街日報》引述兩名知情官員指出，塞國政府計劃以能源開發計劃(主要是離岸天然氣)和銀行權益為餌，吸引俄方出資。二係再推存款稅，不過可能會只係徵收10萬元歐元以上的大額存戶，減少大部份國民的不滿。第三係歐盟包底出手相救；最後一途係破產，被逐出歐盟。
再推存款稅和由歐盟全面包底的可能性都不高，因為賽浦路斯該議員怕得失選民，更怕得罪俄羅斯黑幫，原因係大部份的存款，都來自俄羅斯的非法「黑錢」。CNBC資深評論員Dennis Gartman就表示，「這個征稅提案是在激怒這個星球上你最不願意激怒的人」。他認為，沒有人可以偷走俄羅斯黑手黨的錢還全身而退。
歐盟亦對塞蒲路斯冷淡，由於賽浦路斯經濟規模其實只有區區的240億歐元，根本微不足道，踢賽浦路斯出局，其實影響不太，只係有失面子而已。話係話「三頭馬車」，其實話事人係德國，每一歐元的救援基金支出，有30%來自德國，德國素知俄羅斯在賽浦路斯的勾當，點會肯浪費納稅人的錢資助羅黑幫？有分析甚至指出，提出徵收存款稅呢條橋，其實出自德國。所以歐盟唔可能同意包哂底。
至於第四個可能，賽浦路斯及幕後的俄國人當然唔願意，因為被踢出歐元區，就好難面向世界，發唔到大財啦。所以一為神功，二為弟子，估計俄羅斯最終會出資收購塞國銀行及天然氣業務，搞掂58億歐元，爭取歐央行的繼續資助。
美股跌唔止塞蒲路斯問題咁簡單，背後還有對全球經濟的憂慮，聯邦快遞(FedEx)的業績唔好，近幾日股價由近期高峰109.66美元急滑12%，至96.5美元，昨天跌勢擴散到GATX及 Landstar等運輸股。而有多種工業業務的股份亦下跌1至2%。
兩大速遞公司的業績向來係全球生意的晴雨表，環球經濟旺，佢地生意好，環球差佢地差，睇聯邦快遞就知全球經濟唔好。早前我講過美國係低就業復甦，網友大笨袋鼠講起上次復甦都係咁。其實當中的關鍵係美國經濟衰退時，聯儲局減息放水救市，資金成本便宜，首先利好股市，慢慢才會泌到實體經濟去投資。美國上市公司CEO明知市場水多，造好盤數股價就升，佢自己的股權都會得利，所以睇住盤數的上線營業額唔升，佢地就拼命減下線的成本(匯控就係咁)，以裁員為主，由於佢地機體相當肥，所以一減會馬上見好多利潤，業績就好。
問題是這種減開支式的盈利增長難以永續，所以好彩就捱一兩年捱到生意真正好轉，就是無縫接合，業績持續向好。若實體經濟的增長追唔上，過一兩年減無可減業績又會再倒退。
所以話美股創新高但市盈率仲咁低，好似好抵，其實盈利有水份，所以創高後市場就開始對實體經濟放慢的憂慮加強。亦有小小等待回吐、尋找負面因素的味道。
陸羽仁
回應(1) 我想回應
陸羽仁 BLOG 舊文