金融High Tea 2013年3月22日
金融High Tea——炒業績炒相反
2013年3月22日
中國經濟出現利好數字，昨日發佈的3月滙豐中國製造業採購經理指數(PMI)反彈，錄得51.7，扭轉2月份回落之勢。當中製造業產出指數初值52.8，顯示中國製造業正在改善，經濟仍然保持溫和復甦態勢。這是近期中國出現連串通脹高、經濟動力不足的不利數據後，首次出現較佳數字。
但國內A股上日已急升，昨日反應較平淡，先升後回，尾市反彈。上證綜指收市升7點至2324點。恒指早段走勢亦係差唔多，先升後回，朝早高升136點，午後倒跌，尾市只能在低位徘徊，收市跌31點，報22226點，大市成交只有649億元。計及美股杜指上日創了日中高位的因素，港股真係無厘力水，唯望對好消息無反應一輪，會有滯後反應。
北京打假離婚避稅
內地A股午後回軟，主要受地產股急跌拖累，龍頭股萬科地產收市跌超過2.5%。內地傳媒報道，北京市住建委等部門正研究「國五條」執行細則，其中包括對北京戶口單身及離婚人士進一步限購。過去京籍家庭可擁有兩套住房，有人用「假離婚」，一個家庭一開二，夫婦共有四套房，當局針對這個漏洞改例，單身或離異人士未來只持有一套房。好多內地夫婦在「國五條」公佈後搞「假離婚」，北京呢一招連假離婚都無避唔到稅，費事害到你哋弄假成真啦。
但香港內房股走劫背馳，普遍反彈，其中華潤置地(1109)、龍湖(960)、合景泰富(1813)齊升近2%，碧桂園(2007)漲3.3%，當中表現最勁係業績ok的富力地產(2777)，昨日彈升5%至12.8元。我覺得內房股暫時都係跌後反彈的回升，根本未知佢哋是否已找到短線支持位未。
科技股王騰訊(700)前日收市後公佈業績，真係有好嘢畀我哋學。騰訊上星期一見咗286元高位後，股價一直回，但在業績公佈前連續六天有資金買入其認購證，好明顯係散戶見跌去撈認購輪炒業績。結果騰訊公佈業績基本上符合預期，但股價就大插，昨日低見240元，最後收報252.4元，跌4％。單論走勢，都係炒高引你跟，然後唔等業績就派畀你的格局。最後幾日回馬一槍跌咁深咁急，就係將炒牛證、認購證的散戶一Q清袋。呢啲事情年年發生，又年年重覆，散戶好似唔知炒業績其實朝相反方向炒，最後公布的數字只是其次，即使業績好都可以先殺一浸倉。
睇番騰訊業績都係正常嗰隻，騰訊截至去年12月底全年純利按年升24.8%至127.32億元人民幣(下同)，每股盈利6.965元，比對佢2011年純利升26.7％，去年純利增幅其實唔係放慢好多，特別佢去年中期純利只增15.9％，呢個全年業績其實有交代。
騰訊末季未夠靚
騰訊去年全年集團互聯網增值服務業務收入按年增長39%，至319.95億元人民幣，其中網絡遊戲收入增加44%至228.5億元。集團移動及電信增值服務收入按年增長14%，至37.2億元。集團網絡廣告業務收入按年增長70%，至33.8億元。該項增加主要反映來自新增的社交網絡效果廣告之收入貢獻及視頻廣告收入增長。新業務電子商務交易業務，期內收入44.3億元，佔集團收入10.1%。
騰訊第四季收入121.5億元人民幣，按年升53.4%，高於市場預期的119.5億元，經營盈利按年升20.5%。但唔夠券商估得咁好，摩根大通發表報告指，騰訊去年第四季收入及盈利看似不錯，但線上游戲業績持平、不及預期的按季增4%，互聯網增值業務利潤率因開支上升而趨跌，將其今明年每股盈測下調11%，該股目標價由306元降至300元，續評「增持」。摩根士丹利亦維持該股「增持」評級，目標價則由320.7元微降至1.6%至315.7元，2013和14年每股攤薄盈利則分別降低2%和3%。券商咁睇，騰訊都要先尋底。
陸羽仁
上一頁 下一頁
金融High Tea 舊文