金融High Tea 2013年3月15日
金融High Tea——唔炒樓唔會炒股
2013年3月15日
■繼滙豐渣打加按息後，恒生都加按息，按揭市場一哥中銀香港(2388)只是暫時按兵不動。
■越秀房產基金去年全年純利6.9億人民幣，跌48%，主要是物業重估收益減少影響，派末期息0.1282元。中銀維持買入評級。
港股從周二的高位23262點插了957點，昨日終於單日轉向反彈，小升62點收場，主要多得阿爺股市反彈穩定人心所致。習近平總書記當選國家主席，內地股市自然識做升市報喜。不過大家對後市唔好高興得太早，小心港股未來都係有反彈，無升幅。
昨日最弱的是本地地產股，繼匯豐渣打加按息後，恒生都加按息，按揭市場一哥中銀香港(2388)只是暫時按兵不動。地產股昨日軟晒，長實(001)好少少都要跌1%，新地(0016)和恒地(0012)都大跌3%，遠遠跑輸大市。銀行對上一次加息已經係一年半的事，雖然估計加0.25厘息實際對供樓的人影響不會太大，但市場擔心銀行開始加按息，觸發置業者的加息預期，減弱買樓者信心，所以起勢咁沽地產股。證券界估計呢次加按息只是開始，高盛估按息最後要加到5厘，即係要加2.15厘先停。
政府出招唔會停
中原地產主席施老闆懷疑政府在幕後施壓逼銀行加息，因為按揭生意本來正在減少，銀行要搶生意，無理由反其道而行仲要加息。其實唔使懷疑，銀行講到明係因為金管局早前出招的後果，當局要求實施「內評法」的銀行，將住宅按揭貸款風險的加權比率下限調高至15%，這個風險管理措施會增加銀行成本，銀行轉嫁成本就要加息。由於8家採用「內評法」的銀行主要是大銀行，佢哋合共之樓按市佔率已達7成半，加按息是大勢所趨。
呢次係金管局陳總出招，相信係配合政府控制樓價的措施，表面上只關乎銀行風險管理，唔係要打壓樓市。陳總係AO出身，AO做嘢滴水不漏，佢今次出招令我想起1992年開始實施七成按揭，在此之前銀行容許住宅做九成按揭，樓市炒到飛起，匯豐等大銀行突宣佈將按揭成數減到七成，宣稱為控風險，當時銀行監理專員簡達恒都話唔關政府事咁話。今次陳總手法好有當年出招那種味道，但由於金管局控制銀行風險大條道理，無人話得佢，樓市跌咗都唔好怪政府。
加按息對樓市點都唔係好事，發展商似乎唔太睇好，非常積極出貨。有中環茶友傾起，又加印花稅又加按息，咁搞法樓市無得炒，會唔會逼番啲錢去炒股呢？
越房績佳 炒高套現
我就叫佢諗都唔好咁諗，我話當樓市旺股市又旺時，股市升到咁上下，有啲錢會轉去炒樓，餘此類推，這是金錢多、市場熱的良性循環。若股市呆，樓市又開始回時，即使唔去炒樓，但資金會去避險居多，未必敢去炒股。
最後講兩句越秀房產基金(405)，佢去年全年純利6.9億人民幣，跌48%，主要是物業重估收益減少影響，派末期息0.1282元，佢公佈業績後昨日上升1.5%至4.14港元，升近52周高位4.2港元。中銀維持對越秀房託的買入評級，指上年度業績及物業租金與出租率均勝該行預期，主要受完成收購廣州國際金融中心所支持；中銀提升對其2013至15年度收入預測各101%、16%、5%，料其13/14財年息率可達6及6.9厘，股價上望4.71港元。
由於越房大股東承諾廣州國金中心收益未夠好時會補貼，唔使驚唔夠數。由於大股東想兩年後再注入另一大項目財富中心，估計呢兩年都會對股東好好。當然若4月除淨前股價升得高，有貨者先套利都無相干。
陸羽仁
上一頁 下一頁
金融High Tea 舊文