金融High Tea 2013年6月4日
金融High Tea——亂咁嚟
2013年6月4日
■香港電訊上周五大升16%，昨日大插13%，咁大波動，可能係有人玩嘢，從中獲利。圖為董事總經理艾維朗。
所謂「五窮六絕」，5月美股杜指升2%，5月內地A股更升近5%，但港股卻跌超過1%，有美元上升資金外流的缺水現象，正所謂「人哋唔窮香港窮」，昨日6月第一個交易日恒指又跌109點開場，真係怕6月又係「人哋唔絕香港絕」。
電訊信託狂拋「打盲毛」
昨日個市靜靜哋，但隻香港電訊信託(6823)就大波動啦，上周五大升16%，昨日大插13%，打回原形。老老實實，我真係唔明點解一隻近500億市值股份股價可以咁大波動，唔客氣講，係唔係有人玩嘢，從中取利？
上周五尾市港股波動，一般解釋係MSCI指數換馬，跟蹤指數的基金盤要在尾市掃貨，電訊信託上周五在尾市三分鐘內突爆升18%，收報8.84元，全日累升15%，一般話是MSCI換馬所致，問題係電訊信託今次在MSCI指數比從未有調整，咁搶乜貨？
MSCI香港指數是次調動，加入瑞聲(2018)，佢股價上周五升1.85%。而永亨(302)則被剔除，但上周五股價亦升0.27%。人哋真換馬的股份都係郁2%唔夠，點解電訊信託唔係換馬都要大升近16%咁多？其實諗深一層都知換馬之說講唔通，你係指數基金的基金佬，即使係換馬要補貨，突然見隻股升十幾個巴仙，擺明有人裝彈弓，食夾棍，你都唔會盲買啦，指數基金跟大市上落，如果一隻股買錯咗輸好多，根本無法追，咁點會盲買呢又？
電訊信託呢單嘢有少少「亂咁嚟」的味道，照計應該唔會錯盤錯價，不排除有人趁住MSCI指數換馬混混亂亂，在尾市三分鐘夾起電訊信託個價，博有傻仔跟，實行「打盲毛」，你跟風去追就中招啦。
電訊信託昨日股價打回原形，今日跌13%至7.69元收市，最低曾報7.57元，成交額1.21億元。隻股如今歷史市盈率高達30.6倍，係靠派5.4厘高息吸引人，問題係派派吓現金減少，係唔係年年可以派咁高息？以長線計，呢啲又係「息情陷阱」。
全球股市無精神，源頭係美國國債價跌息升，債息升源於市場憂慮聯儲局退市，令美元匯價回升，資產價格將見頂回落，地產股首當其衝成拋售對象，恒指收市最終倒跌110點，收報22282點。
分析員唔認同四叔睇法
恒地(012)主席李四叔股東會後表示，未來樓市仍會牛皮，又預料美國短期內不會加息，預計一至兩年內樓價上下波幅一成，樓價難跌在於地皮及建築費昂貴，如果樓價再升，政府卻會加強調控力度，令樓價難以大升。佢話，現時買股好過買樓，因為地產股的股價較資產有很大的折讓，在兩至三年內會看到兩者回報率差別。
李四叔身體力行，在5月份10次增持恒地股票，持股量由上月的63.54%升至64.06%。恒地昨日逆市漲0.2%至54.8元。李四叔睇好地產股，但分析員普遍唔係咁樂觀。勝利證券的王沖指，美國量寬(QE)退出的預期確定性增強，海外資金正流出香港地產股和公用股。耀才證券的植耀輝認為，加息周期不會太快來臨，但仍應避開一些負債比重高的股份，地產股也屬息口敏感股，加上港府多項辣招伺候，地產股後市未許樂觀。
陸羽仁
上一頁 下一頁
金融High Tea 舊文