金融High Tea 2013年8月20日
金融High Tea——亞幣燶味濃
2013年8月20日
恒指昨日第三日下跌，不過跌幅輕微，交投仲係異常淡靜，全日成交只有443億元，唔見得有大問題。
不過昨日部份亞洲國家股市開始爆鑊，印尼、泰國、印度股市都急挫，特別係印尼跌得最急，耶加達指數大跌255點，跌幅高達5.6%，泰國插3.3%，印度股市跌1.6%。
日圓貶值就爆災
印尼等地股市大跌，皆受當地經濟負面因素影響，印尼及印度兩國貨幣都下插，印度盧比兌美元匯價創歷史新低，一度貶至62.45盧比兌1美元，昨日黃昏時報62.25。至於印尼盾兌美元在連續兩天急貶1.3%後，昨日再次大貶1%，跌至1美元兌10530盾，是自2009年4月以來的最低位。
印尼股市和匯價跌得咁甘，皆因剛公佈的第二季經常帳赤字擴大到空前高點的98.5億美元，佔國內生產總值(GDP)的4.4%，比第一季為赤字58.2億美元大升69%。印尼經常帳連見赤字，令外匯儲備大減，7月外儲連續第三個月下滑，跌到927億美元，創2010年10月以來最低水平，以第二季經常帳赤字比例，即係一季唔見10%外儲，流失程度好嚇人。
印度狀況都唔好，經濟錄得近十年來最慢增長，國外投資者於7月共出售總值30億美元之印度股票及債券，所以印度盧比才創歷史低位。
所以唔好話中國差，印尼、印度更差，其中一大關鍵是日圓貶值，大大削弱亞洲鄰國的競爭力，中環茶友話，每次日圓大貶值，都見亞洲金融風暴，95年到98年日圓大跌47%，跟住就爆鑊，因為區內國家頂唔順日本咁貶值，唯有競相貶值，但一貶值又令外匯收入大減，左又死右又死，今次唔知係唔係咁。雪上加霜的是美國聯儲局可能在9月收水，美國國債債息大升，再吸引資金流出新興市場。
印尼股市咁跌法，但東亞國家股市無跌，日本股市升0.7%，內地上證綜指升0.8%，好似無事咁，又令我記起2007年5月，當時泰銖出事先，泰國仲要向香港借錢，香港人覺得唔關自己事，但到10月就燒到香港，求神拜佛歷史不要重演。但你睇印尼咁，真係好有燶味，我係索羅斯都想狙擊佢，外匯儲備咁跌法，點抵擋人哋沽佢啲貨幣？
電股又玩大插水
昨日拖累大市的元兇係中資電力股。近期內地經濟低迷，對能源、尤其係煤炭的需求銳減。昨日有內地媒體報道，鑑於煤價回暖的機會唔大，發改委已經做出決定，最早今年10月將下調電價，借此可以刺激工業用電，推動經濟發展。
煤炭佔了發電企業約七成成本，呢兩年煤價不斷下滑，但電費卻維持不變，內地電企此前賺到笑，唔少電企業績都幾靚仔。藍籌股華潤電力(836)昨日公佈中期業績，至6月底中期純利53.31億元，按年升77.6%；中期息8仙，升33.3%。期內營業額323.47億元，升4.5%。期內單係燃料成本就較去年同期節省近30億元，即係話華潤電力有超過一半的純利係來自低迷的煤價。
現在，發改委提出10月電費，中資電力股唔齊齊插水至奇。華潤電力業績雖然好過市場預期，但仍然勁插6%，成為表現最差藍籌股。其餘同業更係慘情，華能(902)急跌9%，中國電力(2380)及華電國際(1071)齊挫近8%，大唐電力(991)表現最硬淨，亦跌6%。減電費，又係電力股的周期轉折點。
陸羽仁
上一頁 下一頁
金融High Tea 舊文