金融High Tea 2013年8月21日
金融High Tea——亞洲骨牌
2013年8月21日
陸羽仁昨日話聞到新興市場有燶味，話口未完就打到嚟，港股跌到七個一皮，幾乎全日捱沽，結果要喺低位收市。
美國聯儲局退市陰霾持續擴散，美國債息攀升，美股連跌四日，不過，重災區係此前熱錢湧入的幾個最熱門國家，愈熱愈大鑊。這些國家包括印度、印尼及泰國。在外資加速流走情況下，股市匯市遭恐慌性拋售，跌到四腳朝天。
其中印度盧比兌美元連番創新低外，股市繼上周五急挫4%後，昨日再挫近2%。印尼盾跌至四年低位，股市全日重挫5.5%，為二十二個月來「最傷」。
誰是下個受害者
區內股市遭洗倉，投資氣氛咁差，中港股市好難有運行。兩地股市朝早仲升少少，但好快已經由升轉跌，上證綜指收跌0.6%。港股一向患有「過敏症」，比A股傷好多，恒指一度跌近500點！
港股跌勢全面，下跌的股票接近900隻。重災區係中資金融股，恒生中國H股金融行業指數跌近3%！中資保險股仲弱，國壽(2628)一跌就跌超過3%。
美國計劃退市，資金班師回朝，令亞洲股市急跌，多隻本港上市的亞股ETF捱沽。XDB印尼(3099)大插近10.%；XDB泰國(3092)跌5%；安碩亞洲新興(2802)跌3%。受印尼股市及匯市急跌影響，持有印尼最大綜合食品公司Indofood約半數股權的第一太平(142)，大跌12.11%，收報8.2元，；積極拓展印度市場的渣打(2888)，則受印度盧比下跌拖累，股價挫6.1元或3%，收180.5元。
市場目前關注係新興市場會否出現骨牌效應，估緊邊個係最弱一環。有分析員認為，印度就係新興市場的縮影。表面睇，無乜本地因素造成印度大跌，該國出現龐大流動帳同財政赤字，已經有接近兩年時間，市場一直當無事，直至美國債息抽升，吸引資金流出，先令到匯價大跌，繼而觸發股市震盪。
外資分析員預期，印度的縮影會在其他高外債的新興市場重現，由於融資成本上升，將會對倚賴借債的國家造成好大衝擊，大馬、印尼等信貸增長迅速的地區成為跟着倒下的骨牌，泰國情況都唔靚仔，菲律賓、南韓會好啲。除了亞洲之外，美洲的巴西和歐洲的土耳其都令人關注。從外資分析員語氣，新興市場撤資潮似乎正在擴散。
風暴剛起不宜太老定
九七年熱錢流出引發亞洲金融風暴，經過十幾年時間，好多股齡不深的投資者未必記得當年慘況。當時先係泰國出事，跟住好似疫症咁不斷擴散，最終搞到香港一褲都係。有人話，香港基礎應該比出事的新興國好，無理由會中招噃？呢個情況發生，固然係因為覆巢之下，難有完卵，同時因為香港股市流通性高，又有沽空機制，於是成為整個亞洲區危機災難的反射鏡兼提款機。
至於今次會點，有人話香港經歷過幾次金融危機，應該會吸取咗教訓啦！陸羽仁唔會話呢個睇法係錯，但大家唔好忘記，喺月前香港金融管理局已經發出警號，話港人家庭負債升上近年高點，加上家風暴可能只係剛剛開始，外資仍然係擇肥而噬，一旦失去警覺性，就可能成為狙擊目標。過去大鱷玩法係先建淡倉，佈好晒個局先郁手，所以就算大家認為香港底子厚，不必太擔心，都唔好咁就太老定，甚至做其樂觀的大好友。
陸羽仁
上一頁 下一頁
金融High Tea 舊文