金融High Tea 2013年9月27日
金融High Tea——月尾有戒心
2013年9月27日
美國聯儲局今個月無退市，全球股市短暫亢奮，但熱情好快就冷卻。臨近結算日，港股轉趨淡靜，除了因為結算因素，另一個原因是10月份係傳統股災月，大家比較審慎，寧願觀望埋結算先。
過去10月份不止一次爆股災，今年唔係咁多人講呢個話題，但少人講反而要留意，尤其現在全球市場都處於位高勢危狀況，美股在歷史高位徘徊，加上始終有退市陰影，大家都驚一個市掉頭，就會先吃眼前虧。港股雖然累積升幅無咁多，但由低位都反彈咗過千點。內地本來講緊加強調控，但因為經濟回落得較急，管理層稍為鬆手，令個市彈咗上去，但彈到咁上吓，大家又開始有戒心，尤其近日內地仲係講緊要審慎管理M2增長，意味着銀根唔會即時放鬆晒。
自貿概念股急插
阿爺上日宣佈上海自由貿易區9月29日掛牌，並有首批約32細則出爐，首批細則不涉及金融，令市場失望，此前炒到㷫烚烚的上海自貿區概念股，即時謝晒，股民雞飛狗走，拖累A股急插近2%。中資股表現弱雞，港股腳軟。恒指低開後回升，但兩度嘗試向上都未能收拾殘局。恒指最終收跌84點至23125點，失守10天線，國指跌57點，收報10541點。大市成交533億元。
國元證券分析師張浩涵認為，目前的能量不足以支撐港股上行，不過，資金仍在持續流入香港，內地經濟數據仍在轉好，港股估值仍在歷史低位，仍有力支撐港股升勢。老外傳媒報道，全球最大零售商沃爾瑪(Walmart)供應商，上星期收到沃爾瑪總部電郵，話會削減第三及四季的庫存。沃爾瑪即時澄清話無咁嘅事，報道「完全錯誤」。部份定單減少只是正常庫存調整。沃爾瑪股價插低2%之餘，使人憂慮美國零售開始走下坡。
沃爾瑪傳減定單，作為其中一個大供貨商的利豐(494)，自然無運行。股價挫超過3%至11.42元。德銀則仍然睇好，認為利豐股價過份調整，預料沃爾瑪2013年銷售額介乎20至30億美元，重申「買入」評級，目標價12.3元。
新股百花齊放
阿里巴巴唔嚟香港上市，港交所密食當三番，新股市場近日幾熱鬧，掛牌表現就好參差。今日掛牌的輝山乳業(6863)，輝立暗盤開報2.76元，較招股價高出3.37%，但其後潛水，收報2.6元，低於招股價2.62%，暫成交383萬股，成交額1004萬元。輝山食住近日乳業股當炒上市，共獲認購48億股，相當於公開發售超額認購11.7倍。
招股熱爆的內地網上遊戲公司雲遊控股(484)，傳招股價以略高於中間價51元定價，股份將於10月3日掛牌。雲浮初步錄得逾310倍超額認購，今年排第六位。凍結資金546億元，成為今年新股「凍資王」。
正在招股的氣霧劑產品生產商，中國綠島科技(2023)將於明天完成路演，聽講國際認購反應理想。今日就有彩色相紙供應商巨星國際控股(2393)公開發售，發售股數為1.125億股，集資最多1.72億元，招股價1.11元至1.55元，隻股細細粒，但好唔好食就唔敢包嘞。
陸羽仁
上一頁 下一頁
金融High Tea 舊文