金融High Tea 2013年9月3日
金融High Tea——季候風遇上低氣壓
2013年9月3日
昨日香港個市明顯和內地背馳，中國8月製造業採購經理指數(PMI)良好，港股開市無耐就抽升2%以上，但內地股市就如死狗，一度跌過1%，唔知係唔係因為打擊國資委主任蔣潔敏的動作好大，內地人人自危，出現罕有中港股市各自走的怪現象。
中國經濟數據繼續好轉，周日官方公佈的8月中國PMI指數升至51，為去年4月以來最高位。匯豐亦公佈，中國8月製造業PMI指數終值升至50.1，係四個月以來首度回升至50上方，新定單和產出等分項指數重歸榮枯線上，較前月大幅改善。中國官方和民間指數都指向製造業暖番少少。
外圍方面，多個北約國家不支持美國佬出兵敍利亞，美國總統奧巴馬上周六話會將決定權交畀國會，中東局勢稍為緩和，恒指借勢高開高走，開市15分鐘就升超過500點，接連突破10天及20天移動平均線。收市漲443點至22175點，漲幅超過2%，成交552億元，國企指數仲勁，大升230點，報10055點，漲幅2.3%。
石油業唔易破壟斷
中環茶友話，昨日港股彈400幾點彈得比想像中多，內地最後無升跌又真係比想像中差，唔假設有大戶玩嘢，只能解作兩地氣氛完全相反。
香港是外資市場，外資最怕中國經濟硬着陸，一見數據無事就撲入去買。但內地股市就幾受打老虎廉政風暴影響，無晒心情炒作。中港股市就如季候風遇上低氣壓，情緒相反！
原中石油董事長、國資委主任蔣潔敏下馬，今次打到中央委員級別，石油體系這個鐵桶江山受到衝擊，在內地的震動好大，有分析甚至認為中央會借機打破石油系統的壟斷。這種討論和中石油(857)的前途有關，該股昨日升1.2%，升幅落後大市。
中環茶友話，要打破油企壟斷談何容易，因為行業投資巨大，又涉及國家能源安全，唔係話打破就打破。外國最簡易的打破壟斷方法是容許外國巨型油企參與，中國唔會咁做。另一個做法係將大公司拆細，例如將「三桶油」(即中石油、中石化(386)、中海油(883))拆做「五桶油」之類，但又唔可以拆得太細，否則會影響競爭力。最重要是，搞清楚問題係周永康系統壟斷抑或中石油壟斷，如果只是人事壟斷，打碎人事系統已經搞掂。預期中石油風波還會持續一段時間，大摩叫人從中石油換馬到中石化或中海油。我估中石油和同系的昆侖能源(135)會受困擾一段時間，無耐心者唔好掂佢哋。
新盤郁地產股炒上
同一個大孖沙傾起，中央吹起反腐風，對民企影響大得多，不少民企(特別做房地產者)都有中央高官做後台，後台一出事，公司難翻身。佢講起個幾月前有一個內地老闆，曾想用兩個值200億的煤礦抵押向佢借40億，佢唔敢借，而家諗起一額汗，若借咗錢，中央突然一句話指那個老闆有問題，嗰兩個抵押的煤礦馬上凍過水，仲點可以收番啲貸款？聽佢咁講，內地都有啲人人自危的感覺。
上周末有大型新盤開售，單係星期六都有500個一手盤沽出，地產股即刻有反應，全線造好，其中長實(001)升2.2%至113.1元，恒基(012)表現最好，漲超過3.4%，收47.05元。美聯(1200)無乜生意做，股價仍升1.7%至2.99元。殘股炒反彈，都唔使太多理由。
陸羽仁
上一頁 下一頁
金融High Tea 舊文