金融High Tea 2013年11月5日
A股有機
2013年11月05日
美股向好成為全球股市的動力，關鍵係有海外業務的公司受惠有幾大。匯控(005) 昨日公佈第三季業績，列帳稅前盈利45.3億美元，升30%，派發第3次股息每股10美仙，折合每手收息310港元。不過，以實際基準除稅前利潤按年計，只升10%至50.56億美元，是市場預期51億至56億元的下限。消息公佈後，匯控倫敦股價稍微造好，到香港再開市就要睇升勢可唔可以繼續嘞。
匯控成績表唔難估
匯控行政總裁歐智華話，集團在監管政策持續不明朗，而且環球宏觀經濟好壞參半，第三季收入仍然保持穩定。來自英國和香港兩個本位市場的收入，佔集團實際基準除稅前利潤一半以上。季內香港表現良好，大部份收入均有增長。
北美洲業務方面，歐智華透露仍要以重組提升盈利能力和增長。過去數月經營環境困難，但環球銀行及資本市場業務表現穩健。
市場觀望匯控張成績表，但陸羽仁就不會有太高期望。好多本地投資者分析業績，只係睇增長數字，其實?家炒股，特別係炒國際性業務的公司，必須留意外圍大氣候。金融類股份去年在美英市場反彈不少，早已有點開到荼蘼的味道，但美國市底旺，一瓣炒完到另一瓣，今年大主題係炒科技股，由於呢個係新興大行業，炒上空間夠大，令到華爾街升勢長盛未衰，但金融股早已經唔係主角，係呢個場景下，匯控業績未有驚喜，發圍機會應該唔大嘞。
從業務上睇，美國市道復甦，歐洲穩定番好多，跨國銀行生意無前幾年咁難做，但係現時息差仍然窄，即係話銀行仲係做緊微利生意，故此盈利表現好難畀到想像之外的成績，呢個唔係匯控獨有的限制，只要睇通咗呢點，點樣分析個別季度業績，就容易掌握好多！
同一道理，市場注視緊即將召開的第18屆三中全會，係未有大政策之前，港股吸唔到乜嘢新資金入市，塘水滾塘魚下，雖然外界預期外圍會帶動港股造好，結果大市卻是先升後回。恒生指數昨收報23189點，跌60點；國企指數反升7點至10686點，成交金額縮減至只有451億元。
商品大王再出口術
市場傳中央政府將會以前所未有的力度改革經濟，炒A股氣氛逐漸熾熱，連國際投資者都聞風先至。經常出口術的「商品大王」羅傑斯在廣州演講時透露，最近買入了4、5隻中國股票，其中包括紅酒股、媒體資訊及鐵路設備股，聲稱還會進一步增持，呢個係佢自2008年11月以來的首次再度入市。他表示，中國政府正着力營造健康的股市，係「5年以來，第一次看到機會。」
選股方面，羅傑斯非常睇好環保、清潔能源、水處理等行業股票。原因係「中央政府已經意識到問題，相信會花很多的錢治理環境和降低污染。」農業亦係政策支持的行業，笑言「未來最好就是投資農場或者是做農夫。」
阿爺近日已經宣佈，為了提升農業競爭力，已批出超過8億元作為農業綜合開發資金。國金證券重申四季度農林牧漁股在「需求旺季、政策旺季、溫和通脹預期」下的投資機會。農業股昨日逆市向上，浩倫農科(1073) 及第一拖拉機(038) 齊漲，玖源集團(827) 更升超過5%。
陸羽仁
金融High Tea 舊文