金融High Tea 2013年12月10日
路邊雞股
2013年12月10日
美國就業數據改善，華爾街股市爆升收市，對香港呢個係好消息定壞消息呢？從好的方面嚟講，經濟復甦有利企業盈利同出口；從壞的方面，就係經濟強勁，聯邦儲備局想唔收水都唔得，一旦收水，香港必然受影響啦！
低位儲貨等食胡
收水有利有弊，呢啲睇法好多人都知，但如果從短線炒作分析，美股借住強勁數據炒上，港股出現先升後回穩，同12月櫥窗裝飾有密切互動。今年大市先低後高，家個市叫做係全年最高點，但全年升幅唔算太多，對基金嚟講，若然想分紅收多少少，最好就係臨尾再「隊」高多少，但家唔係大牛市，點樣先可以較大把握做到呢個效果呢？
一個方法就係人進我退，遇着個市炒高就沽吓貨，儲番啲子彈，等年尾有多啲彈藥，保證有個開心聖誕，所以係月底市，個市係有個勢想調整吓，但散戶可以等低位買吓貨，博係今年尾、明年初食番次胡。
昨日大市個勢就係依住呢個估計發展，本來內地通脹數據低過預期，加上上周五美國經濟進一步好轉，11月失業率跌至7%的五年新低，大幅推高美股，但投資者就話擔心聯儲局提早退市，恒生指數兩萬四關前即見掉頭，結果全日只升68點，收報23811，國企指數表現好啲，收報11432，升56點，成交由上周五的636億元，縮至540億元。
藍籌股昨日升多跌少，當中有七隻升多過1%，其中表現最好的是招商局(144) ，漲5.5%至28.8元，巨股騰訊(700) 表現硬淨，地產股就普遍回軟，反映基金係選擇性沽貨。
招商局彈升，多少係因為有大行唱好。瑞銀表示，招商局會係出口復甦及馬士基航運(Maersk)、法國達飛海運集團(CMA CGM)及地中海航運(MSC)等航運業三大巨頭計劃組建P3聯盟的主要受惠者。招商局過往在收購上多數都能提升盈利，預料將有數項涉及環球大型船公司的收購，可進一步提升旗下內地碼頭業務。
招商局近期主動整合深圳西部港口，預期長遠可改善效益及提升收費。另外，公司在前海擁有地皮，只等待批准改變用途興建商用物業，瑞銀估計地皮每股值2.4元，相當於每平方米6000元，目標價由32元上調至33元。招商局由8月底約24元開始炒上，兩次在30元大關前止步回落，若突破30元，下一個浪頂係36元，若想短炒可守緊止蝕位。
新盤好賣地產股照弱
過去兩日地產商開出新盤，賣出接近600個單位，係辣招以來最多的紀錄，但地產股依然無神無氣，分拆業務的嘉里(683) 有回吐，太古地產(1972) 創出一年新低。地產股賣樓好，股價弱，中環茶友話同市場預期有關，新盤賣得好，大家擔心政府會加辣抑壓樓市，這是該類股份無運行的理由之一；美國退市，不利樓市氣氛，是理由之二。
茶友話，地產股雖然弱，但大家可以當佢係「路邊雞股」。好多年前，香港爆發禽流感，搞到政府一鑊粥，之後班官諗咗一招，就係係農場外養批路邊雞，要嚟測試病毒有無經候鳥傳入。家地產股弱過藥煲，但照睇短時間內政府加辣打樓市機會好低，到年底前，如果個市炒反彈，有可能就會揀呢批股份落手，如果到咗差唔多時間，大家見到地產股止跌回穩，甚至陰陰哋回升，可能就係資金落鑊先兆，有機會可以跟走一轉嘞！
陸羽仁
金融High Tea 舊文