金融High Tea 2013年12月23日
冧巴唔易畀
2013年12月23日
美國上周宣佈退市，美股趁壞消息炒上，各大指數再創新高，無奈港股仲未有運行。內地拆息上周末再度抽緊，搞到上海股市九連跌，股民想係聖誕前賺返份禮物，睇嚟唔容易。
聖誕前夕，例牌多聚會，陸羽仁上星期出席幾個「扒地」，撞到幾位靚靚師奶。今年散戶好多損手爛腳，難得幾位靚師奶投資興致仲係好高，猛問有乜股樓好買。講起先知原來佢哋老闆年初聽陸羽仁介紹，買咗隻越秀房託(405) ，跟住買入沽出，賺咗一筆。消息傳咗開去，靚師奶平時忙於工作，無乜點炒股炒樓，所以雖然市場風高浪急，佢哋都無損傷，仲有實力去趁低入貨，所以猛問有咩「冧巴」介紹。
入咗貨唔理隨時甩轆
靚師奶鍾情聽「冧巴」，陸羽仁都好想幫佢哋保吓值﹔不過，遇着呢啲情況，都唔敢口輕輕亂介紹，因為唔知靚師奶拎住啲「冧巴」去點買，須知家市場瞬息萬變，叫咗佢哋上車，驚遇到大環境有變，唔記得叫佢哋落車！靚師奶正職唔係炒股，平時多數無時間睇市，入咗貨以為大安旨意，咁就隨時甩轆，變咗好心幫人變害人嘞，所以都係推介佢買啲太子食唔壞的指數工具，好似安碩A50(2823) 、南方A50(2822) 、國指基金等。
靚師奶嘅個案，多少反映散戶如果無基本的認識，又無時間留意市場大氣候變化，投資保值都唔係咁容易。好似有位靚師奶，佢對買股興趣唔係咁大，但就好有興趣買樓自住，而家目標係用500萬至700萬元，係市區置業，佢問陸羽仁買唔買得過？
老實講，樓價升跌只有兩個方向，但要睇準絕對唔易。若然講買樓自住，因為是用家性質，回報要求可以低啲，但如果買入即刻撞正跌價，點講都係唔過癮。從基本因素去睇，美國剛剛開始退市，力度幾大仲未知，如果收水收兩收就停，甚至放返水，對樓市當然無壞﹔相反如果美國經濟無被退市潮打窒，停止買債後增長仍然保持，2015年真係加息，樓市就會面對比較長的緊縮周期，原本由資金推動的物業大牛市，就有可能逆轉。
從香港角度睇，除了外圍因素外，仲多咗個政府打壓的因素。家政府用「雙辣招」去壓住個市，住宅交投大減，業主可以死守，主要係息口太低，大家沽貨意欲好低，當市場出現轉向，業主心態仲係咪可以咁強呢？有人話，家買樓係易跌難升，因為個市跌就好哋哋，一升政府就張牙舞爪，擺出加辣的姿態，係咁環境下，樓價又係咪咁易升呢？所以如果係有樓住，只係想換樓改善居住環境，咁就不妨等吓，就算係上車，都可以唔使咁心急，又或者縮細注碼，唔買咁貴嘅樓，咁樓就算撞着跌市，都唔會影響心情。
「冧巴」唔變 大氣候會變
買樓要留意風險，咁買股又點睇呢？投資股市嘅技巧複雜小小，要睇宏觀氣候，又要識揀股，有時同一隻股，環境轉咗投資價值都唔同咗。好似靚師奶老闆去年買越秀房託，3個幾入貨，升到4個幾沽貨，獲利兩成幾，計落相當和味。今年第四季，隻股跌返落嚟起步點，靚師奶老闆見隻股開始回，好快就心思思想食過返尋味，仲問陸羽仁諗唔諗得過？陸羽仁就解釋，房託股過去幾年表現標青，同市場資金太多，避險投資需求大增有關，所以唔單止雙越房升得好，其他房託基本上都係雞犬皆升，但今季房託回落，除了受大市調整影響，本身面對的環境都唔係咁靚仔，最簡單係被視為無乜風險的美國長息，反覆升到2.8厘樓上，同之前比勁升咗唔止1厘，係美國長債都提供到咁嘅回報，其他收息工具要畀的回報，係咪要水漲船高呢？房託正係受呢個影響的投資類別，所以雖然佢個價跌番去靚師奶老闆入貨的水平，但你去買，效果已經未必一樣，唔單止越房係咁，其他房託都一樣。係股票市場，做同一個動作，得到的結果不一定相同，甚至有時係相反，皆因時移世易，只有變幻先係永恒，投資係藝術而唔係科學，原因之一就係呢樣。正因為咁樣，所以如果一年只係見一、兩次面，畀「冧巴」好易變成高危動作，叫佢哋買吓指數掛鈎的工具，雖然賺唔賺得太多，但跌都唔跌得好緊要，符合投資先要保本的基本原則。
靚師奶攞「冧巴」，引起陸羽仁長一時感觸長篇大論，完全係因為覺得散戶投資的確唔容易，橫衝直撞好易變做鱷魚點心，尤其而家美國啟動退市，內地明年銀根仍然會偏緊，市場形勢開始有變，投資一定要識得執生，正如上個星期，美國證實會退市，華爾街當壞消息證實嚟炒，點知港股忽然被內地年尾收水拖住後腿，無得跟升，入定貨等食火雞股暫時就要捱肚餓！
錢荒過後櫥窗亂晒
上星期內地「錢荒」來襲，利率持續飆升，人民銀行上周雖然通過短期流動性調節工具(SLO)向市場注入流動性，有說法注入規模2000億元人民幣，其後聽聞注資額高達3000億元人民幣。當日上海銀行間同業拆放利率全線上揚，以7天期漲幅最大，升118個基點至7﹒65%。質押式回購加權平均利率今早開盤顯著回落後，再次掉頭上升，隔夜及7天期盤中高見10%，刷新近半年高點，14天曾高見12%，午後銀行間資金缺口於午後得以平補，隔夜及一個月才回落至4﹒91%及7﹒6%。
這次年尾錢荒來勢洶洶，主要同大小企業年尾要交數有關。內地企業以12月底作為年結日，屆時所有帳目要交數核查，好多平時不在帳內的資金，都要在該日現身，形成撲水埋數極為緊張，在流動性極其不足下，連股市都緊到抽筋，特別係同銀根有關的金融股最傷，內銀股普遍向下，中資保險股近乎全軍覆沒。平保(2318) 旗下平安銀行否認違約，惟全日收報67.1元，重挫4.6%，跌幅為藍籌最大，恒指連跌三周，上周險收22800點，國企指數跌穿10710點的牛熊分界線，聖誕前股民期待的櫥窗裝飾搞到亂晒。
拆息觸發上海股市九連跌，似乎唔係阿爺原意，故此啟動咗SLO注資，但呢個機制唔係咁高透明度，消息未即時全面反映。照正路嚟睇，錢荒有好大成因係技術因素，加上阿爺已作出紓緩措施，希望係年結日前後，市場情緒會改善，等基金經理可以整番靚小小個櫥窗埋年結啦！
陸羽仁
金融High Tea 舊文