金融High Tea 2014年1月17日
識抽水係叻仔
2014年01月17日
美股標普創歷史新高，刺激港股昨日再度高開企於兩萬三之上報23085，可惜又一次高處不勝寒，大市迅即回落關下。美股咁勁，可惜都帶挈唔到香港股民。
我喺網誌「過期向上」講到，世界銀行將今年全球經濟增長預測由3%上調至3.2%。是自2010年以來最樂觀的經濟展望，世銀認為全球經濟已經進入「拐點」。美國今年增速為2.8%，明顯高過去年的1.8%增長。有中環茶友睇到，就補多一句，美國政府最新公佈的財政盈餘數字，比預期為佳，反映復甦力度繼續增強。
美國對上一次錄得較大規模財政盈餘，已經數到去克林頓時代，當時美國對外無大型戰爭，對內經濟繁榮，令政府由赤字高掛變成錄有盈餘，結果係美元轉強，吸引資金紛紛回流美國，當時炒外幣黃金，個個無啖好食，唯獨係肥咗股民同債市大鱷。
向上周期銀根唔會鬆
美元匯價會否重蹈當年強勢，對全球投資市場至為關鍵，而家美國情況有啲似當年，奧巴馬結束咗伊拉克同阿富汗的用兵，雖然呢幾日前國防部長蓋茲出書，為咗吸引眼球鬧咗前老闆兩句，話佢當年對增兵阿富汗表現缺乏膽識，實際上奧巴馬減少派軍隊外出，大大減少軍費，利好減赤，美元一旦轉勢，對金融市場影響好大。
美國周期向上，有可能令儲局有條件持續退市，甚至加快速度。喺銀根唔會鬆的大環境，好多企業同大股東都傾向減債同增持現金。除了幫上市公司吸水，部份大股東都幫自己荷包打算吓，好似翠華(1314) 大股東就趁高減持，批股後該股應聲急跌，一度失守配股價5元大關。
翠華批股消息傳出，分析家普遍反應係，做人要識抽水先係叻仔，好多人見到公司股票係咁升，都會信咗明天會更好，希望一瞓醒覺股價又升，身家又厚咗，結果忘記賣咗股票袋咗錢先係實在。以翠華現價市盈率去到四十幾倍，本地租金人工不斷上升，洗碗阿姐去到萬三元月薪的日子，茶餐廳老闆減吓磅袋番些少真銀暖袋，點都唔會蝕底，照計大股東賣完，小股東應該都收到訊號啦啩。
騰訊變出神仙股
過去七日間，共有五日出現兩萬三關得而復失，昨日算係最似樣，早市及午後均曾多番衝破，只是始終未能企穩。恒指全日收報22986，升84點，國指則跌14點報10187，成交金額增至651.7億元。
市場焦點自然是宣佈以溢價1.4%入股華南城(1668) 的股王騰訊(700) 。受好消息沖喜，騰訊再創上市新高，最高見536元，最終升幅收窄至0.79%，報512.5元。獲得股王青睞的華南城變成神仙股，復牌即報3.98元，較騰訊入股價2.2元足足高出80%，最後收報3.49元，仍升60%。
華南城將與騰訊在電商及物流方面合作，能獲股王相中，一眾大行合力唱好，大幅炒上已是預期之內。市場人士認為，騰訊此舉，或是對阿里巴巴近期接連尋求合作對象發展物流的反擊之舉，不排除續有後着。
陸羽仁
金融High Tea 舊文