金融High Tea 2014年3月12日
股市厄爾尼諾
2014年03月12日
港股回升4點咁大把，經過周一大跌近400點後，昨日尚算企穩，不過人行無懼出口數據欠佳及經濟下滑風險，再度出手收水，局限了大市反彈力度。
藍籌股昨走勢分歧，匯控(005) 報80.35元，跌0.12%；友邦(1299) 亦跌1.22%；港交所(388) 則微升0.42%。
民營銀行牌有殺傷力
中銀監主席尚福林話，已確定發五個民營銀行牌作試點，惹起好多人注意。尚福林話，目前已確定首批試點銀行，分別由參與設計試點方案的阿里巴巴、萬向、騰訊(700) 等民營資本參與試點工作。建議由兩家民營資本夾埋攞一個牌，所以10家參與企業發五個牌。
見到咁狀況，第一個想法是民營銀行入場會加快對國有銀行的挑戰；第二個想法，是互聯網巨企有平台有渠道接觸客戶，好似騰訊咁，畀個牌佢服務小客戶，佢容乜易通過微信服務幾億客戶呢？呢種消息對內銀股唔係好消息，我覺得長線有殺傷力。但內銀股可能之前跌得多，對壞消息都無乜反應，建行(939) 和工行(1398) 都只係跌0.2%。騰訊亦只係微升0.2%去賀一賀佢。
港股周初大跌，巿場理由係馬航意外引致保險股受壓、又話因為中國公佈的數字唔靚仔。有中環茶友話，除咗呢啲因素，會唔會同衍生工具有關呢？上個月恒指仲叫做頂住頂住，呢個月大戶要做嘢搵食，就先嚟殺一輪好倉，等指數急插一輪掠掠水先，之後隨時再嚟回馬槍殺埋淡倉。
股市人為干擾惹異象
茶友話，呢排科網股托住個市，但龍頭騰訊咁鬼貴，好多炒家都走去炒期指、國指或者其他衍生工具，大戶舞弄指數搵食，山大好易斬埋有柴喎。茶友呢個睇法，從牌路睇都有可能，若然係咁，不排除個市又會借啲意彈下，殺埋一浸淡倉。
至於睇長啲個市，3月份好多時係好淡分水嶺，通常第一季個巿會好啲，3月炒業績公佈，4月炒除淨就已經係水尾。
今年美國1月跌市，好彩2月補番升，但跟住到兩會同業績公佈，唔算有乜大好消息，慶幸係有科網概念頂住，正如我早兩日講，?家個市幾乎係靠單天保至尊，唔知仲補得幾耐。
過去經驗，3月份係港股比較多好消息的時間，好消息唔係話無，但就唔同傳統的消息，主要係來自網企的市場動作或者併購，所以好多傳統股股價都缺乏動力，話回到去大件夾抵食的地步，喺咁情形下，就要睇跟住落去的時間，會唔會變成賤物鬥窮人嘞。
茶友聽完我咁講，就加多兩句，話去年第四季起，新股上市都幾旺，但係去到呢個月，好似都露咗啲疲態出嚟，正常嚟講，3月份好少會出現咁情況，呢種現象令佢留意，旱季係咪提早降臨。
究竟旱季係咪提早嚟？答案只能係事後先知。?家投資市場氣候，一樣係有厄爾尼諾現象，經常變得反常同極端，原因是人為干擾不斷增加，加上熱錢在全球流竄，變成好似有溫室效應。如果從呢個角度去睇，周初股巿大跌，都係出現極端天氣的徵象之一，大家不妨留記心中，當見異象出現次數增加，就要防禦天災突襲。
陸羽仁
金融High Tea 舊文