異動空間：變招搵食有竅門 - 魏力
■中國旺旺屬近期走勢最標青的內需股。
恒指裂口重上100日線，直撲二萬三，動力突然轉強，形勢已變成「炒市不炒股」，舊年套炒法唔再啱用，不妨試下轉另一套思維：掃落後藍籌，暫時唔炒二、三線股，甚麼科技、濠賭、醫藥、新能源股，暫時放埋一邊，專注留意恒指及H指成份股，有勢就撲入，係升得慢啲，但總好過左一巴、右一巴，俾新經濟股摑到冇曬信心。
利豐(494)業績後氣勢唔同曬，分拆授權品牌業務(GBG)雖被指玩財技，但可釋放資產價值，基金睇落相當受落，股價昨呈突破之勢，升穿12蚊可追入，中線睇14.5至15元。阿爺「穩增長」措施除力谷基建外，刺激內需應是焦點之一，百麗(1880)近日靜靜起革命，低位反彈15%，10日線升穿20日線，形成黃金交叉，利好短線走勢。身為內地龍頭鞋王的百麗，預測PE僅12倍，昨收8.39元，downside有限，上望高盛報告目標價9.5元。
至於走勢最標青的內需股，要數中國旺旺(151)，昨創上市新高12.78元。該股於10至12蚊上落足足一年，呈現大W型突破，成交亦配合向上，確認再展升浪，可待後抽至12.5元買入，量度升幅見15元。
魏力
http://www.facebook.com/2012jason
上一則: 何車500：大唐新能源超賣 - 何車
下一則: 青心直說：跌不等於玩完 - 胡孟青
異動空間 - 魏力 舊文