中環在線：AGM變收刁大會長建股東向小超獻計 - 李華華
■李澤鉅邊行邊指住地下，似發現不滿地方。三位領呔款式相同嘅保鑣就唔八卦，一眼關七。易仰民攝
近年密密做大刁嘅長建(1038)噚日舉行股東周年大會(AGM)，股東問答環節就變成「收刁大會」，唔少股東伺機向公司主席李澤鉅(小超人)獻計。
小超難得識講笑
長建股東要發問，先要寫紙仔，然後由公司秘書揀出來，畀管理層回答。有股東提議，長建應同子公司電能(006)合併，亦有股東話，不如叫和黃(013)分拆旗下赫斯基石油，然後以中海油(883)嘅市盈率作價注入長建，呢啲聽落都幾瘋狂嘅提議，曾經自稱「poker face」嘅小超人，聽完竟然冇黑面，仲笑笑口問：「係咪investment banker問㗎？你嘅建議收到㗎喇。」原來佢都識講笑喎。
不過亦有股東質疑，公司提出以每股1.32澳紙現金收購澳洲天然氣分銷商Envestra太貴，小超人就幾唔客氣反駁佢，「1仙都唔差好遠」，而且「買返來可以upgrade，唔係就咁坐喺度」。
現場雖然有即時繙譯，但小超人似乎唔太鍾意，自行雙語廣播，仲推己及人，叫長建副主席葉德銓答完廣東話，要再用英文答多次。
電能股東拒小超連任
不過咁，小超人的確係同長建股東就算係有講有笑，但電能股東就未必咁諗。
電能噚日亦舉行股東會，居然有26%出席嘅股東，反對小超人連任董事，用收市價69.75元計，呢批反對嘅股份市價值258億元㗎，唔知公司使唔使同基金股東加強溝通呢？
李華華
mailto:LiWaWa@AppleDaily.com
上一則: 樂香園：又係國家隊 - 密西比
下一則: 中環在線：74歲鄧蓮如fit到漏現身 - 李華華
中環在線 - 李華華 舊文