魚樂無窮：熔盛猛人入局有睇頭 - 唐牛
經過上星期霸氣式炒上後，港股噚日又打回原形，成交500億銀都唔夠，認真奀豬。噚日個別板塊有零星消息︰市傳世界盃舉行前，內地會正式發放互聯網彩票牌照，帶動彩票三寶發威，又以第一視頻(082)爆升21%最精采；另有傳國家電網公司今年將擲1,600億人仔於配電網建設，電力股同樣受追捧。
近年蟹貨幾近消化
另一單關於電力股嘅消息，就係華電國際(1071)臨收市驚爆烏龍盤，有一宗62萬股華電股份交易，每股成交價高達5,860元，涉及金額36億銀，相當於H股市值近六成，認真誇張，話唔定經紀近期落盤少，搞到對手硬曬軚，先至擺個咁大嘅烏龍，算係為平淡嘅市況加咗個有趣話題。
港交所(388)其後宣佈，相關交易將會被取消，相信事件應告一段落。智能手機落盤越見普及，但正所謂忙中有錯，間唔中㩒錯掣亦屬正常，所以一去到緊急關頭，唐牛都係會打電話搵經紀落盤，就算出錯都有錄音證明。
異動股方面，不妨留意呢期強到爆嘅熔盛重工(1101)。集團早前向巨人網絡創辦人、民生銀行(1988)股東之一嘅史玉柱，發行10億元可換股債券，換股價1.07元。弱股有猛人加盟，反彈力度當然double上，不足兩周一度炒高五成，兼有成交配合，幾近消化近兩年嘅蟹貨。呢幾日正在高位整固中，一旦再見陽燭，隨時係新一輪升浪嘅開始，值得密切關注。
唐牛
上一則: 炒友Blog：潤燃估值偏低可留意 - 邱古奇
下一則: 股場放大鏡：熱炒中俄合作揀中燃 - 歐陽風
魚樂無窮 - 唐牛 舊文