金融High Tea 2014年5月20日
增持現金
2014年05月20日
內地滬深股市挫逾1%，昨日港股輕微高開後即掉頭下跌，午後跌幅曾擴至157點。不過，大戶擺明係唔想放生淡倉，喺無乜好消息下，午後開始發力推番高個市，漸漸收復失地，最終更重返22700點上收市，收報22704點，只係微跌8點，成交縮至472億元，扣除華電國際(1071) 的36.33億元錯盤成交，實際成交436億元。
個市成交咁少，大戶要個市上就上，落就落，真係話都無咁易。傳統上，5、6月份係交投淡靜的日子，但好似今年縮得咁快，都係較為少見。有講法話係世界盃就嚟開波，基金經理唔揸咁重貨，遲啲就可以輕裝上陣睇波咁話。呢個講法唔可以話無，但就似乎係結果多過成因，個市無嘢炒，基金經理咪少啲落場等睇波，如果有嘢炒、有錢搵，相信班大鱷唔會咁早就等睇波啦。
擔心通縮美債息跌
美股連日上試高位，但分析家同基金經理看法分歧，有基金睇好，但亦有基金增持現金。陸羽仁最近對一位美資對沖基金傾偈，佢透露已經將現金水平提升到5%，理由係憂慮美國出現通縮。通縮即係今日唔買嘢，明日會仲平，呢個現象唔止會係日常用品身上發生，仲會係投資工具上出現。專業投資者若然係發現有通縮出現，策略係增加現金，等佢更平時入貨，但咁樣即係話今日無乜人會買股啦，故此通縮係股市嘅敵人。
歐洲目前已經講緊通縮，央行出定口術話會出招，但美國經濟睇落好過歐洲，點解忽然都話驚有通縮呢？對沖基金經理話一個理由係人民幣貶值，因為內地通脹回落之餘，人仔匯價又軟，對美元貨品扭轉過去匯水月月上升的趨勢，成為壓抑物價的成因。如果細心啲睇，美國債息自從去年底攀升後，近月開始調頭回落，跌番落2.5厘以下，去到近期低位，顯示資金唔再擔心通脹，有錢流番入債市。
通縮係股票嘅敵人，陸羽仁聽完對沖基金經理呢個講法，留意到佢講通縮源頭會係人民幣貶值，咁樣會唔會影響咗外資對內地股市嘅睇法呢？第二季開始，北京容許人民幣雙向波動，匯價出現較長時間嘅調整，呢樣嘢同美國容許日圓大幅貶值有一定關係，內地作為回應措施，容許人仔匯價跌番吓，既有減壓救經濟的作用，同時可以打擊熱錢流入內地炒作的誘因，自從匯價波幅擴大，可以見到中央政府雖然無再大力出手壓抑房價，但內地樓市已開始慢慢退燒，相信呢樣嘢同少咗熱錢炒賣好有關係。
長和派錢贏歡心
外資對中國資產有戒心，陸羽仁睇得長少少，認為中國調整經濟，用內地術語叫做「經濟換檔」係發展中的一個過程，下半年當換檔逐步完成，增長有機會快番啲，由於股市會走係實體經濟之前，當最壞情況出現後，股市就有機會成功試底。
喺基金經理重視現金的心態下，有啲股份就成為贏家，好似長和系兩隻旗艦股份大派紅利，除淨之後就股價有力，和黃(013) 昨日又逆市上升，收咗息嘅股東自然笑騎騎。
和黃出售屈臣氏部份股權，套現之後將部份回籠資金回饋股東，佢阿媽長實(001) 仲豪爽，唔止將收番嚟嘅股息盡派，而且加多啲實行派突，令長實每股派息可以同乖仔睇齊。長和咁派法有乜玄機呢？有熟悉該系的老友話，長實喺年頭，負債比率只係得兩、三個百分點，後來賣咗啲樓，負債應該仲低，手頭大把錢，咁咪不如益吓股東囉。喺大家覺得現金購買力將來有增無減下，派高息呢一次果然贏到唔少基金經理歡心，於是股價咪漲完又漲，入咗嘅醒目錢呢次又食胡！
陸羽仁
金融High Tea 舊文