一周三件：再生能源估值平 - 錢雋
■筆者分析指，中國再生能源係場內PB最平嘅潔能股，合營班底強，值博率高。
中國再生能源(987)由上年尾0.53元，跟個市齊齊插水，累跌過40%，係場內PB最平嘅潔能股，有得諗。
再生能源NAV 0.76元，現價(0.32元)貼喺近六年低位，PB得0.4倍。場內龍頭PB，坐底兩倍樓上，而近級數嘅行家中國風電(182)，家陣0.85倍PB、聯合光伏(686)由上年10月到家陣，急插近70%之後，PB仍然高達5倍。又中國環保能源(986)五個月大跌過80%，PB仍然挨近1倍，中國電力新能源(735)近磅啲，亦講緊0.55倍。再生能源PB平通街。
再生能源唔少風電場，係拍住祖國大孖沙「中國節能環保集團」齊齊上，講夥伴合作實力，超強。而集團呢個超殘價，街貨市值得3.4億銀，總市值不過7.7億銀，當升兩倍計，總市值先上到24億銀，未有耐追到中電新能源同中國風電，過40億銀市值。
再生能源市值細細粒，合營班底強，假定咁講，集團要引資超級大孖沙，甚至賣盤，博取更好前景或升值，又得唔得？
事實上，早喺2012年，阿媽香港建設(190)就曾經公佈，可能出售再生能源權益。雖則，呢壇製作最後取消，但協商係有前科。
龍頭已行有力追落後
又2008年，港建入主再生能源，成本近4億銀，相當於每股0.69元，再生能源現價潛水50%過外。咪扯咁遠，估同上年一樣，經過第一季調整，喺國策同實際國情下，資金重投環保股懷抱。
而噚日所見，龍頭包括京能(579，升咗6.9%)、華能新能源(958，升3.4%)開始生猛，冷灶煲再生能源，當翻半番計，到0.49元，PB仲係得0.64倍，未有耐上返阿媽入主價。
錢雋
細價股專家
本欄逢周二、三、五刊出
上一則: 金手指：點sell第三跑道 - 孫柏文
下一則: 板塊尋寶：揀隻收息過癮的股票 - 王昇
一周三件 - 錢雋 舊文