金手指：點sell第三跑道 - 孫柏文
■筆者指出，機場第三條跑道的問題仍未解決，其中一項竟是漁農條例。資料圖片
上周孫柏文去咗聽機管局sell第三條跑道。講真，佢係得兩個位未解決，同有一樣嘢唔好再講。唔可以再講嘅，就係「華南3小時生活圈有幾多幾多千萬人嘅需求」。
中港矛盾都唔識，how out of touch are you？應避重就輕話兼異曲同工咁話：「香港機場全球最勁，let"s keep it this way。」
漁農條例成關鍵
未解決之一，就係需求預測。高、機、西鐵後，任何官方經濟、需求、預算預測嘅說服能力，有如啲歐洲銀行壓力測試結果咁高。唯一能說服香港人，就係搵私人闊佬去孭風險回報，你話BOT或機管局上市唔得，都仲有財技能將三跑未來收入做抵押咁集資。
你一宣佈將風險回報射出去，而真係有儍闊佬攞真金白銀、你情我願咁同你癲，香港人仲唔服？我哋香港人最驚就係環境被破壞後，血汗錢又用乸咗，仲要冇人用！咁樣好乸折墮。
未解決之二，中華白海豚。甚麼甚麼環境評估，oh please，又係冇人信的。如果機管局及航空公司能做到國家繁殖熊貓咁繁殖白海豚，完工時放生，咁香港唯一比中港矛盾更強嘅「東風」就有望能被借，即「虐小貓狗龜者應處死」力量(西洋菜街屙屎都未見叫打靶，不過你試嚇用煙頭搞隻貓？)。
如驚人唔信，咪搵個太古(019)白皮膚大班去head呢單嘢囉！
所以機管局首先要做史無前例咁大嘅研究。不過我問佢哋例如有冇幫啲海豚裝GPS晶片時，等我哋起碼知佢哋有冇喺珠江口遊來遊去，還是一定留喺赤鱲角，佢哋話：「政府漁農條例話唔畀安裝。」同行嘅施永青都即話：「嗰啲乜國家地理都幫啲藍鯨咁做啦！」再咁搞，他朝國泰(293)股民同被delayed嘅你坐喺terminal瞌埋眼回望時，唔通真係一條漁農條例，打瓜第三跑道？
孫柏文
獨立股評人
http://facebook.com/shuen
本欄逢周二刊出
上一則: 青心直說：工程質素最緊要 - 胡孟青
下一則: 一周三件：再生能源估值平 - 錢雋
金手指 - 孫柏文 舊文