魚樂無窮：利君三優勢悶市奇葩 - 唐牛
■王憲軍任執行董事的利君醫藥有齊業績亮麗、股東增持、圖表靚仔三大賣點，有望在淡市中突圍。資料圖片
大市明顯進入點穴mode，近日恒指高低波幅都係200點咁上下，炒期指即日鮮嘅，已經去到一百幾十點都唔可以放過嘅階段，認真頭痛。炒個股嘅，繼續要向消息股埋手︰內地禁止採購安裝最新視窗Windows 8系統嘅電腦，內地軟件股有望喺保護主義下突圍，零舍醒神，金山軟件(3888)、金蝶國際(268)、中國軟件(354)等，連出兩支陽燭，絕對係還神之作。世界盃舉行在即，屆時成交隨時薄弱過戰友嘅意志，根據贏谷輸縮嘅道理，如忍唔到手要買貨頂心癮，切記只可小注怡情。
悶市還悶市，推介還是需要的。利君醫藥(2005)有齊業績亮麗、股東增持、圖表靚仔三大賣點，有望在淡市中突圍。
大股東密密掃貨
利君公佈最新季度業績，截至3月底止，首三個月營業額增長14.6%至8.1億銀，毛利率按年上升2.7個百分點至46.8%。主打嘅靜脈輸液業務，營業額按年增長19.1%至4.74億銀，毛利率更升4.6個百分點至49.6%，動力十足。公司大股東兼行政總裁曲繼廣，去年至今密密增持股份，股價亦拾級而上，由兩蚊邊升到上三蚊樓上，曲繼廣新近以平均價3.072元再掃貨，意味利君仍未到佢嘅目標價，跟炒一轉隨時有驚喜。
睇圖表，雖然大市波動，但利君一直守穩起自1月嘅上升軌，有計！彭博綜合券商預測，今年市盈率16.5倍，較過去三年平均折讓近一成。集齊三大印花，有望成為淡市奇葩。
唐牛
上一則: 炒友Blog：確認小雙底英達可吼 - 邱古奇
下一則: 股場放大鏡：聯夢太殘配股利反彈 - 歐陽風
魚樂無窮 - 唐牛 舊文