金融High Tea 2014年5月22日
小心飲罰酒
2014年05月22日
大戶揸𨋢技術真係唔到你唔服，早兩個月外圍升，港股可以懶理照跌，到呢個月就掉轉玩，前晚美股杜指高位回落138點，港股昨跟住低開，但係俾佢托吓托吓，竟然又托到升1點收市，大戶手瓜之硬，真係唔到你唔寫個服字，睇嚟呢個月唔殺晒啲淡友唔收手。
國家隊保住政策底
陸羽仁啱啱講內地樓市病病地，二三線城市的感冒有可能傳染大城市，高盛昨日就話擔心內地資金緊張，房地產困境將持續；不過佢矛頭就指向內銀股，將佢哋平均目標價降8%。但市場呢次唔聽佢支笛，內銀股普遍升，主要係因為內地再傳出現「國家隊」護盤手影。
上證昨日其實都幾波動，早上一度跌穿2000點「政策底」，低見1991點，創兩個月新低，其後因為傳國家隊出動，個市報復式反彈，尾市加速上揚，終以近全日最高位收市，報2024點，升16點。深成指同樣跌後拗上。證券分析員預期，中央政府會使出政策、輿論及注資等招數救市，其中注資會通過買入大型國企股份及指數基金來進行。
受惠A股反彈，恒指力保不失之餘，國企指數表現標青，全日上升1%，暫時仲未能企穩一萬點大關上。照咁情況睇，如果外圍企番穩，大戶好可能撐到月尾期指結算。
股市近排無乜焦點板塊，但就有好多突發事件惹人關注，一單係美國突然越洋起訴解放軍的黑客，話佢哋做商業間諜。大國喺網上過招，係唔使講都知的秘密，但係喺千里外要郁手拉人，中美當然無引渡協議。咁美國繼續作呢個匪夷所思的指控，好明顯係姿勢居多。有人話美國咁搞，係為了聲援越南，我就話係針對中俄昨日在上海簽埋傾埋10年的天然氣協議，兩國行得更埋。有人笑言，喺美國搞緊上市的阿里巴巴，睇到唔知驚唔驚日後被美國佬玩喎。
家阿里在美國招股，正同騰訊(700，臨時編號2988)有份投資的京東打對台，本來市場應該較歡迎阿里，不過時間上就京東會快啲。阿里在本月6日入紙申請上市，以佢咁大間公司計，一般要兩三個月才批准，估計要到7月中至8月初，家突然爆出單黑客事件，中美矛盾升溫，係咪代表政治風險增加，以馬雲為首的主要股東真係要你諗你囉。
黑客風波你諗你
有準備分拆網企來港上市的內地老總預言，阿里去美國上市，生意做得差仲好哋哋，若然生意做得好，美國佬就隨時變臉，到時想甩身都唔係話想就就可以走。馬雲嚟香港斟上市，本來港交所都幫佢諗咗好多辦法通融，但佢可能俾反對佢的聲音窒親，企硬一定要同股不同權，佢咁拗頸，最後會唔會變成有香港敬酒唔飲，老遠走去飲美國嘅罰酒，大家都好想知道。所以呢位老總喺旁邊剝花生做觀眾，都好想佢喺美國成功上市，等佢可以真正睇到最後結果係點！
除咗火美國隔山打牛告解放軍，另一單話題新聞係《財新網》引述消息人士指，方方被老廉拘捕，或與他在摩通任職期間，涉嫌透過聘請內地高官子女獲取不當利益有關。
現時方方獲准保釋，但被限制出境，報道仲話摩通投資銀行部的中國團隊現時人人自危，銀行更替員工聘請律師，應對未來可能的調查。
自從華潤高層宋林被中紀委調查，市場分析中央打貪大棒已打到香港，摩通呢次事件唔排除只係拉開序幕，跟住點發展相信充滿戲劇性。本來呢次事件對股市不利，但月底前大市好似有金鐘罩咁樣，大家就當睇戲啦。
陸羽仁
金融High Tea 舊文