異動空間：津創大折讓可炒
股榮周日文章講到全職炒股的難處，可謂正中要害，有份糧去守，炒股個本叫閒錢；靠炒股為生，個本就係開飯錢，壓力係兩個層次。魏力未試過全職炒，但睇市為工作之一，日日睇實難免入市搵食，故也可算是半全職散戶。由朝睇到晚，最難就係坐貨，滿懷希望買入，但等咗5日、10日、1個月，股價點穴唔鬱，或者仲要坐艇，但隔離戰友隻股就日日升，點頂？
一鳥在手總好過百鳥在林。換馬？炒開股肯定試過，一沽就升一追就跌，唔係你黑仔係人性使然，連閣下都忍唔住換馬，即係大把人咁做，炒起嗰隻梗係派貨；散戶打曬靶，跌嗰隻自然反彈。輸多幾次後仲邊有信心揸中線？有糊就食，鋪鋪雞糊，三五格都唔放過，扣埋使費肯定經紀賺最多，忙完一大輪最後剩番張長過論文嘅月結單。久而久之炒上癮，唔做trade壓力仲大，好怕miss咗機會，但以有限金錢追逐無限股票，結果就係俾股票玩返轉頭。
資金續炒滬港通概念，創業(1065)集折讓、環保及貨源歸邊三大因素，較A股折讓五成，大股東加中央結算持股近75%，配合國策炒起更easy！快破頂好戲快上演。
魏力
http://www.facebook.com/2012jason
識睇一定睇蘋果嘅足動世盃：
http://worldcup2014.appledaily.com/
魏力
異動空間 - 魏力 舊文