金融High Tea 2014年6月17日
揩油水
2014年06月17日
中東地緣政治風險急增，美國喺伊拉克撤兵，前腳離開，後腳就作晒反，極端伊斯蘭組織大舉進政，竟然話威脅首都巴格達機場。美國喺好多地方打仗，都係虎頭蛇尾，呢個結果唔係估唔到，只係無諗過嚟得咁快。油價續硬淨，帶動國企三桶油中石油(857) 、中海油(883) 及中石化(386) 股價曾創52周新高。
否決私有新中唔係壞消息
伊拉克係產油大國，家伊斯蘭武裝份子攻陷不少產油地區，有專家擔心能源供應受影響，油價可能向上炒上150美元，若然係咁，油企當然開心，但用油行業好似航空公司就無眼睇嘞。喺資本市場，乜嘢都有得炒，中東地緣政治動盪當然唔例外，而且仲係好好炒嘅題目。
中環茶友話，佢唔係軍事專家，唔知中東局勢會點變，但佢就知投資市場通常唔會一就係一、二就係二咁簡單。伊拉克「立立亂」，但佢覺得油價係升係跌，仲係美國佬話事。以前美國係用油大國，油價一旦升得太急，就會影響經濟，甚至觸發衰退，但自從近幾年美國大力發展頁岩油，美國由能源入口國變成自給自足，家仲講緊可以出口石油，喺咁情況下，美國佬又會唔會借啲意撩高油價炒作吓。
油價係國際政治嘅大棋盤入面，係好複雜同敏感嘅元素。自從中國崛起成為石油大買家，形勢不斷發生微妙變化，近日俄國因為烏克蘭問題同美國撐到「行」，中俄喺能源合作上即刻加強合作。本來，由美國增產到中俄合作，都係利淡油價，但美國佬喺中東搞到一頭煙，渾水摸魚先炒吓油都唔奇。
由於石油係有戰略價值嘅商品，就算油價基本供應無以前咁緊張，內地油企海外擴張步伐無停，中海油同阿媽都無停過。如果油價呆滯，承擔呢個任務就變成貢獻國家，所以今年中海油股價都係弱弱哋，直至最近先至炒番上13元樓上。三桶油雖然同屬國家石油巨企，受油價影響卻好唔同，中海油集中上游開採業務，油價升對佢最有利，相反中石化集中下游提煉業務，高油價對佢有害無利，中石油業務平均，受油價影響較為中性。油企受內地打貪影響石油幫官員拖累，估值普遍唔貴，好似中海油家歷史市盈率8.6倍，股息率4厘，能唔能夠再上，要睇美國佬係中東點揩油水嘞。
喺中東不穩同世界盃效應下，大市全日上落只得108點，恒生指數收23300點，微跌18點；國企指數收報10522點，升5點，成交縮至478億元。收市後，傳出新世界發展(017) 公佈私有化新世界中國的建議，因為在法院會議未能通過被否決。由於私有化作價唔平，消息對新世界嚟講似係好多過壞。
「港滬通」概念繼續玩
個市雖然呆呆哋，但炒「港滬通」概念仲有得玩吓。呢個概念暫時炒緊兩樣嘢，一樣係AH股折讓；另一樣就係本地證券商股。上個星期敦沛(812) 公佈話賣盤畀內地同業，新鴻基公司(086) 、時富金融(510) 都炒咗上一年高位。炒呢類概念股，如果佢湧高你走去追，好易就即刻被人綁，震兩震就會震到唔知去咗邊。「港滬通」唔係即刻就嚟，好多細節仲要慢慢搞，如果覺得呢個概念玩得過，都係吼低先買穩陣啲。
今個星期新股上市幾多，紙質捲煙包裝的設計生產商嘉耀控股(1626) 、商務園區運營商億達(3639) 、「洋參大王」楊永仁旗下洋參批發商恒發洋參(911) 、中國新城市商業發展(1321) 、花樣年(1777) 分拆彩生活(1778) 紛紛招股。內地淨水服務供應商浩澤淨水(2014) 今日掛牌，暗盤市場報2.98元，較招股價升10%。
陸羽仁
金融High Tea 舊文