魚樂無窮：如何避免做股海LuLu
■LuLu喺德國對葡萄牙時成功破燈，如果唔想做股海LuLu，各位股民就要從錯誤中學習，避免重蹈覆轍。資料圖片
今屆世界盃最hot話題，唔係尼馬有幾fit，唔係朗尼底線傳底，唔係美斯破入球荒，而係女神LuLu連環做燈事件。雖然佢喺德國對葡萄牙時成功破燈，但之前連續幾場企錯邊，足夠成為全城熱話。不過，LuLu喺facebook講明，估波只為娛樂，一句「Why so serious」，性格豁達，值得股民學習。
靈活轉身避過大屠殺
大家可能又話我抽水，硬要將LuLu拉埋股市一齊講，但試想想，炒股有邊個未試過做燈？沽貨即爆升、高追即中伏情況比比皆是，最緊要係從錯誤中學習，避免重蹈覆轍，否則畀部印鈔機你都唔夠輸。
唐牛今年嘅經驗，就係活生生嘅例子︰頭一兩個月順風順水，狂炒科網、環保等新經濟股，破位即追策略萬試萬靈，叫做搵到餐晏仔。但去到3月，形勢開始逆轉，高追次次遇著假突破，溝貨就越溝越跌，蟹貨越嚟越多。此時驚覺賬面盈利冇咗一截，痛定思痛後，將蝕本貨全線斬纜，並轉打小注怡情陣式，結果成功避過重倉股如IGG(8002)往後的大屠殺。馬後炮式檢討，炒股唔可以一本通書睇到老，呢兩年無敵嘅破位追策略，近月成為慢性毒藥，亂用隨時致命，老土總結，就係要隨機應變！
今晚唐牛愛隊荷蘭再度亮相，迎戰袋鼠國澳洲。荷蘭首仗表現令人刮目相看，今場贏波賠率乏味，睇好荷蘭大炒嘅，不妨向狀態大勇嘅雲佩斯埋手，博佢今場入兩球(4.65倍)甚至3球或以上(9倍)！
唐牛
https://www.facebook.com/tongcow88
識睇一定睇蘋果嘅足動世盃：
http://worldcup2014.appledaily.com/
唐牛
魚樂無窮 - 唐牛 舊文