金融High Tea 2014年6月18日
慘食詐胡
2014年06月18日
在美國議息前夕，港股腳仔軟軟，最多跌咗過百點，尾市跌幅收窄。中環茶友問點睇，陸羽仁覺得，美國息口長線梗係升多過跌，要留意係歐洲實施負利率，形勢對美元有利，依家係咪加快退市甚至提早加息，隻牌係耶倫手上。
耶倫被屁股指揮腦袋
未做聯儲局主席前，耶倫被視為鴿派，不過，做得呢啲位都係屁股指揮腦袋，首先係要考慮點樣對聯儲局同自己最有利，而唔係鴿派或鷹派的問題。站係央行行長的立場，當然要考慮經濟同就業，但呢樣嘢都有長期同短期的考慮。
從短期考慮嚟講，梗係要保住就業數字靚靚仔仔，唔好搞出大頭佛；不過，從長遠小小講，如果眼前就業唔係咁大鑊，咁最好梗係儲番啲彈藥，等日後有需要時用來救急，頂吓個經濟啦，而家美國經濟雖然叫做穩番，但唔好忘記美息仲係歷史低位，即係話如果經濟再出乜事，耶倫手頭無乜子彈可以應付。從呢個意義上講，假如情況許可，佢放啲聲氣，為加快退市甚至加息，其實唔係完全無需要。
美國貨幣政策變化緊，港股氣氛比較緊張，但從昨日個市表現，大戶似乎仲係想托住，所以如果耶倫無驚嚇性言論發表，唔排除大戶會夾一夾，上一上高位先。不過，就算個市夾一夾，陸羽仁都諗緊大市仲可以上幾多，因為說到底，大市累積升幅已經唔少，如果低位撈咗啲內銀股，依家隨時執咗兩成，係目前嘅大氣候，試問仲夫復何求？
新中教訓堪記取
觀望外圍之餘，內地上月FDI(實際使用外資金額)差過預期，加上人行今日再抽水，向市場實施正回購300億元人民幣，上證指數應聲下挫0.92%，恒指收23203，僅跌97點，其實已算係咁。
茶友昨日另一個話題，係新世界中國(917) 私有化被小股東數人頭砌低，股價應聲急跌，曾跌穿5元，收市報5.3元，跌咗17%，新世界(017) 收造8.8元，跌1%。私有化慘食詐胡後，大行仲嚟踩多腳，大摩發表報告，話私有化失敗，新中股價可能持續受壓，會影響埋阿媽新世界發展(017) 表現。而摩根大通就發表報告，認為新世界中國私有化方案未獲通過，將令新世界股價受壓，但認為這是掃貨良機，因此維持「增持」評級。照咁睇，大行一致睇淡新中短期表現，反而佢阿媽就好壞一半半啦。
佢阿媽新世界為咗個仔新中私有化供股，但消息公佈後，新中股價長時間同私有化建議價有近一成折讓，不少網友問過點睇，當時市場有過不少分析，陸羽仁就認為其中一個可能性係私有化存在風險，故此有大戶寧願收少啲，先係市場沽貨食胡。由於市價同私有化價相差近一成，若然成事股民入市買股執錢快過執豆，用英文講今次嘅教訓叫做好到難以置信(too good to be true)，加上阿媽建議私有化新中的價錢唔算好平，當時我都係網上同專欄叫大家要考慮收割吓，而家睇番證明真係無咁大隻「蛤乸」隨街跳。
陸羽仁
金融High Tea 舊文