陸羽仁 BLOG 2014年6月18日
由friend變唔friend
2014/6/18 上午 09:07:57
網誌分類: 經濟
美國聯儲局今晚結束一連兩日的議息會議，投資者等待聯儲的議息結果，大市觀望氣氛持續。昨日公佈的美國5月份的消費者價格指數創出16個月新高，金融股及中小型股造好，推動美股輕微收高。
杜指微升27點至16808點；標普500指數漲4點，收報1942點；納指升16點，造4337點，稍為跑贏大市。
美國樓市復甦極慢，商務部昨日公佈5月新屋開建數字，減少了6.5%，年化數字下降至100萬套，差過預期的102萬套。而營建許可減少6.4%，下降至99.1萬套，反映美國樓市復甦緩慢。
不過，5月消費者價格指數(CPI) 就好過預期，攀升0.4%，創2013年2月以來新高。扣除食物及能源部份，核心CPI增長0.3%，符合市場預期。通常，通脹顯示經濟正在成長，所以唔係太高的通脹，對經濟以至股市係積極的訊號，正為投資人入市的理由。而0.3%的通脹離聯儲局的2%指標尚遠，又不會令人擔心加息。
金融業係百業之母，經濟好轉自然有利金融股，特別係銀行股。標普金融股指數昨日跑贏，升0.9%，其中ETrade Financial 升7.7%，係表現最好嘅標普500指數成份股大，嘉信理財(Charles Schwab) 亦大漲5.5%。杜指成份股中，高盛漲1.4%，摩根大通升1%，亦排係表現最好嘅第一及第三位。
美國就業市場改善，以及工資有更快增長，將有助於提升市場需求，物價開始回升。而通脹略升溫，減低了物價持續下跌損害經濟增長的威脅。但亦會進一步鞏固聯儲局官員，維持退市的信心。聯儲局今晚將結束貨幣政策會議，市場普遍預計當局將宣佈繼續縮減每月購債規模100億美元至350億美元。而市場比較關注嘅利率的走向。瑞銀證券經濟學家Samuel Coffin表示，「目前有壓力跡象，勞動力市場好轉，而且繼續有跡象顯示物價壓力略增，這將促成聯儲局産生新的思路。」所謂新思路，提早加息是也。事實上，通脹數字公佈後，10年期美國債息收市突破2.6厘關口，報2.6532厘。
但更多人信聯儲局議息結果無新意，Wunderlich 證券首席策略師 Art Hogan話，聯儲局或會改吓經濟前景展望，會繼續減100億每月購買資產數目，但不會對長遠利息政策有變，會重申維持低息一段時間。聯儲局不同英倫銀行同歐洲央行，聯儲局似自動導航系統多啲。
就業及通脹數據改善，聯儲局嘅鷹派聲音會變得更加響亮。不過，我估計聯儲局未必咁快會露底牌話傾向更嚴緊貨幣措施，而家只是6月，可以等遲少少睇多啲數據再講，歐洲又話量寛，何不睇定再講。
再講幾句昨日的話題，網友大笨袋鼠提到我那位朋友功高蓋主，問他那次立功會唔會威脅到上司David個位？
當然會。朋友拉到一個富豪客做銀行客仔，雖然唔知會帶來幾多生意，但大老細一定知，若然情境都知埋，就會話David做乜咁矇查查架? 我講呢個故仔唔係想話老細David老土，係話人生唔好錯位。好多老細即使唔係老外性格，為表友善，甚或想收賣人心，都會對新認識的夥記特別客氣，有的夥記唔係幾敏感，以為自己係老細個friend，一朝得志，語無倫次，好易玩完。
我今日再講一個相反例子，係老外下屬對中國人老細，事發在10年在中環一個甲一級寫字樓的廁所內，我去一間美資大行，同一個老外傾一單嘢，傾完大家咁啱有需要一齊入廁所，講起題外話，老外有個新老細，係中國人，我問佢:你唔打慣中國人的工，換咗中國人老細適唔適應呀?
老外係叻人，話無問題，佢話老細十分洋化，加入佢間大行之前，大家係同行都識，有打波飲嘢，好friend。我識得佢老細，亦係超級叻人。我想提醒佢，就再話:「本來係朋友，做咗你老細就唔同架啦，中國人性格同外國人唔同，你當佢老細好啲啦」。
老外一臉不以為然，佢啱啱做緊一單生意同梅鐸有關，接觸過梅鐸，就話「即使係梅鐸咁難搞的人，我都搞得佢掂，你放心啦。」
我心諗你太托大啦，你老細係中國人，難搞過梅鐸呀。結果一年之後，我講的事情出現。老外同唐人老細關係急促轉壞，未做上下級時是好朋友，做咗同事就唔同曬，老外頂唔順老細話佢呢樣唔得、嗰樣唔掂，呢個老外由細到大都好成功，我估佢那一年受的批評，一世加埋無受過咁多，最後自己頂唔順走人。事後我有少少壞疑，唐人老細入呢間大行之前，同呢個老外咁friend，只係為咗收風，摸清公司個底才入去。但老外卻以為是真friend，中曬招。呢個故仔叫做「由friend 變唔friend」。
陸羽仁
回應(15) 我想回應
陸羽仁 BLOG 舊文