中環在線：
蓋茨專登赴京陪馬雲食飯
■蓋茨(左)喺自己嘅Twitter上載同馬雲嘅合照，話係傾慈善事宜。互聯網
阿里巴巴創辦人馬雲好識得搵猛人幫手做宣傳，繼日前披露搵到本港前特首、全國政協副主席董建華做阿里獨立董事，本周二仲邀請到微軟創辦人蓋茨(Bill Gates)專登飛去北京同佢食飯。呢項估計為阿里赴美上市而做嘅形象工程，真係唔係人人做得到。
蓋茨周二喺自己嘅Twitter披露到咗北京，準備跟馬雲會面，商談有關慈善事宜，仲上載咗一張兩人一路行一路傾偈嘅相片，身型偏瘦嘅馬雲身穿中山裝，跟蓋茨行埋一齊，雖然矮對方一個頭，但係氣勢十足。
■飯局座上客包括牛根生(左一)。 做慈善搞好形象
佢哋嘅飯局相就由馬雲老友，即係華遠地產董事長任志強上載微博，見佢哋一圍枱大約有10人食飯，有網友認出，座上客包括任志強、蒙牛前大股東牛根生、銀泰(1833)老闆沈國軍、招商銀行(3968)前行長馬蔚華同埋影星趙薇老公黃有龍。馬雲當然坐喺蓋茨旁邊喇。
蓋茨一向熱心慈善事業，佢45歲就建立家庭慈善基金，又唔做微軟行政總裁，50歲已經專心發展慈善事業，仲跟股神畢菲特一齊鼓勵各地富豪捐出大部份身家作慈善用途。
蓋茨與畢菲特早於2010年曾經喺北京郊外邀請一批中國富豪食飯，傾慈善大業。呢次佢對住一班馬雲老友，位位有錢有面，叫佢哋做善事應該冇難度。
何況阿里搞緊去美國上市，馬雲與阿里另一位創辦人蔡崇信今年4月已經捐出部份股份成立估值234億元嘅公益基金，如果再跟蓋茨傾掂乜嘢慈善大計，肯定獲廣泛報道，阿里上市前，馬雲為搞好形象真係不惜工本。
李華華
mailto:LiWaWa@AppleDaily.com
【我撐公投】毅行直播
網頁: http://622popvote.appledaily.com
LiWaWa@AppleDaily.com
中環在線 - 李華華 舊文