金融High Tea 2014年6月19日
鴨子划水
2014年06月19日
美國聯儲局開會前，全球股市「靜英英」，但各方好漢變咗「鴨子划水」，係平靜的水面下猛做工夫。英國《金融時報》就突然爆料，話聯儲局主席耶倫研究緊整定個水閘，徵收債券離場費，防止一旦加息，資金會由債市大幅撤離，造成災難。
聯局放汽球減衝擊
呢類消息無鬼唔死得人，《金融時報》講得出咁具體，可能係儲局有關人士放吓汽球，你話徵收離場費係咪一定會做，家無人敢講，歐洲搞存款負利息都敢，賣債要收離場費，當然唔係無可能。
懷疑係儲局放出收離場費的汽球，除咗直接試探市場對構思反應，更加重要的一點，可能係想話畀大家知，耶倫?家真係諗緊加息啦，你哋要做好準備喎！
美國10年期債息係儲局退市初期，在去年底今年初一度上試3厘水平，但近月又陰陰跌番落去2.6厘左右，反映債價仍然高企。若然息口明年上調，到時債息先至扯高，令債價急劇回落，就可能挫傷經濟，搞亂儲局上調利率至接近正常平均水平的大計，故此唔排除有人現在就出來放放汽球，出吓口術，等利息上番咗先。
從呢個角度去揣測儲局動向，壞消息係耶倫真係傾向收緊銀根，好消息係佢會安排唔同步驟減少影響，如果佢的計劃順利展開，投資者就要準備適應超低利率慢慢會消失的環境。
市場聚焦聯儲局議息結果，兼且本港多隻新股即將或正在招股，恒指收報23181點，跌21點；國企指數收報10444點，跌22點，成交再縮至463億元。伊拉克局勢不斷惡化，「三桶油」繼續逆市造好，雖然升幅唔算多，但都顯示強勢本色。
手機股又短炒
大市暫時要靠逐瓣炒過日辰，由於資金力水唔係咁夠，好多時都係炒兩日又搵新題材。有報道話，A8電媒(800) 與小米合作，計劃將在兩個月內公佈，刺激A8電媒股價突然爆升，最多升達34%，高見0.98元，並於午後停牌，待發澄清媒體報道，停牌前造0.9元，大升23%。其他小米概念股同樣出現追捧，通達(698) 升3%，報1.06元；時捷(1184) 升2%，造3.08元。另外，酷派(2369) 登基成為內地4G手機市場一哥，市場份額達23%，大幅拋離次位的三星，股價大幅攀升，收報1.9元，抽升7%。
不過急升股亦易急跌，前日大炒賣盤的豪特保健(6880) ，昨日插番15%，收0.92元，走慢半步都夾死。
藍籌股中，新世界(017) 表現最叻，收市報8.97元，升咗差不多2%。陸羽仁同中環茶友昨日講過新中私有化泡湯單嘢，茶友聽完之後有個觀察，就係呢單嘢雖然「喎咗」，但新世界主席鄭家純就表現好輕鬆，一啲都無勞氣。今次單私有化係被小股東數人頭砌低，反對股權比例非常低，但純官被人問到咁樣有無問題，佢就好大方咁話尊重制度。
新世界勞師動眾搞集資為新中私有化籌集資金，使費都要一筆，難得管理層仲「笑 騎騎」，茶友話，新世界雖然私有化唔成功，但佢籌集的資金唔會無用，?家地價跌咁多，佢用啲資金去買地，將來回報一樣咁正，所以佢點使勞氣呢？所以大行摩通都叫人趁佢下跌去掃貨就係咁解。
新股方面，由方興(817) 分拆的金茂投資(6139) 今起招股，每股作價介乎5.35元至5.65元，入場費2853.48元。
陸羽仁
金融High Tea 舊文