魚樂無窮：從半新股出發搵靚殼
■李志生任主席的Mega Expo市值只得兩億銀，又係一隻潛力靚殼。資料圖片
儲局議息前夕，大市悶戰連場，恒指午後一度抽高百點，但原來又係空歡喜一場，埋單倒跌21點，上落格局未改。6月以來，恒指波幅竟不足500點，成交keep住四五百億，如果唔係有世界盃睇，日子都幾難過。
跟進一下豪特保健(6880)最新情況，業績後插水15%，原因有兩個︰第一，業績普通。雖然全年計盈利按年爆升3.3倍，但拆開上下半年睇，半年計倒退近四成，持續增長動力不足。第二，業績公告未有提及賣盤最新進展，催化劑欠奉。不過，從賣盤角度出發，第一點並非壞消息，因業務走下坡，大股東放手機會更大。另一點值得關注嘅係，公司宣佈派發末期息0.814仙，變相將現金派回給大股東，又係賣盤另一必經階段。如戰友有跟本欄建議於高位先食一半糊，現階段應仍有微利，可以繼續坐貨等消息，收市跌穿0.84元先行計數。
Mega Expo屬好材料
殼股方興未艾，今日推介嘅半新股Mega Expo(1360)，又係靚殼一隻。公司主力舉辦展覽會及相關配套服務，雖然業績平平，中期盈利倒退28%，但市值只得兩億銀，大股東持貨七成，兼有1.3億茄殊揸手，係殼股好材料；加上半年禁售期已過，近期成交及股價均見異動，似有聰明錢入場，值得關注。
世界盃方面，日本隊首場對科特迪瓦表現可人，今仗面對歐洲二線隊希臘，有望打響勝鼓，一於押注主客和主勝(2.1倍)及讓球主勝(1.88倍)！
唐牛
https://www.facebook.com/tongcow88
【我撐公投】毅行直播
網頁: http://622popvote.appledaily.com
唐牛
魚樂無窮 - 唐牛 舊文