陸羽仁 BLOG 2014年6月11日
相反理論
2014/6/11 9:22:49
網誌分類: 經濟
美股昨日可謂悶局一場，先跌後彈，杜指收市升7點，標普500指數微跌唔夠半點，全日波幅唔夠7點。許多投資人見到美股連續幾日創出歷史收市新高，唔係幾敢入市，但又睇唔到沽出的理由，於是就買賣兩閒，牛皮渡日。
美銀美林策略師在報告中對風險承受能力不高的客戶建議，小幅減持股票倉位，反映謹慎程度略有上升，但仍對股市保持正面看法。美銀美林的Resource Investment Committee表示，將中度風險客戶的股票配置輕微減低2個百分點至66%。
有分析發出警告，稱交易量持續低迷以及低波動性，已經引發了緊張情緒，使人擔心股市可能會在意想不到的時候，突然大幅回調。不過，睇股票恐懼指標VIX指數又唔見到有人緊張，VIX指數上日彈1.6%，昨日又跌番1.4%至10.99，投資者對後市，起碼近期的30日內的市況，仍然異常樂觀。
華爾街的傳統智慧，「5月賣出離場」(Sell in May and go away)，今年睇落唔係幾得(我4月底5月已預告)。杜指及標普500指數5月屢創新高，納指也收復了年初前兩月的大部分失地。事實上，據高盛的一項統計數據顯示，投資者5月份確實習慣性的拋售股票，並且將資金轉移到債市，不過拖唔低股市。
數據顯示，5月份美國股票共同基金資金外流規模為100億美元，其中細價股基金的資金外流規模最大。在過去5周，ICI美國股票共同基金資本外流達120億美元。債券基金和國際股票基金5月份都錄得資金凈流入。國際股票基金資本凈流入70億美元，可納稅型債券基金資本凈流入110億美元，混合型債券基金和市政債基金均有資金流入。高盛的報告還顯示，今年以來，養老基金一直在拋售美股、買入債券，高盛表示，其拋售股票的速度超過了預期。
杜指16946點，趨向17000點大關，機構投資者牛熊比例大失衡，牛仔是62.2%，歷史上第二高，熊仔少到得17.3%(其餘是中性)。好多人由唔信會升，變成覺得溫和經濟增長是大市上升的依據。上升的股票移向對經濟根本睇好的周期股，美國本月升得多的有金融股升2.8%，工業股升2.2%，普通消費品股升1.9%。
不過在人人看好美股時，我開始有啲保留，估計一場回吐可能已在轉角位得緊啦。
陸羽仁
回應(4) 我想回應
陸羽仁 BLOG 舊文