中環迷你裙：謀殺A股的凶手
■陳有安任主席的銀河證券市盈率為同業中最低，可以考慮趁勢炒一轉。資料圖片
近年魚缸中飄泊，少接觸政治新聞，Samantha視之為一件好事，跟得太貼恐防爆血管，回歸17年，一個家庭可以養出二世祖，社會足以養成一批丟人現眼的議員，點解立會提問可成錯誤英文的範本，多謝「I don"t think so囉」議員，再來真心錯喺「斯德哥爾摩候群症」(其實是症候群)，肥彭話齋，一點一滴地斷送在香港某些人手裏，不只是自主權，聲譽早已毀喺呢班人手上。隔條河的A股，又何嘗不是斷送在一班自詡為精英的人手上？
中信証券(6030)醫藥行業首席分析師張明芳上周五在微信發表內幕訊息，在社交平台發放訊息目的只有一個，就係唱通街，我等散戶會如此解讀呢個行為：「我係知呢間公司發限制性股票和期權，走漏消息好正常，我淨係想曬嚇命啫！」這亦充份突顯內地股市有幾唔公平，散戶早已意興闌珊，上月A股開戶人數曾創出有紀錄以來最差。不過若以炒股角度，散戶遠離魚缸，亦代表離A股見底不遠矣。
承著IPO引擎開動，長期冇起色的券商股紛紛炒起，主力做投行業務的中信証券升幅最顯著。
第二浪不妨吼銀河證券(6881)，全年純利21.35億元人民幣，按年急增50.4%，市盈率僅13倍，為同業中最低，MSCI今日將公佈會否將A股指數納入新興市場指數，對辦的話趁勢炒一轉。
Samantha
本欄逢周三、五刊出
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp
Samantha
中環迷你裙 - Samantha 舊文