金融High Tea 2014年6月11日
扶旺不扶衰
2014年06月11日
個市好似智利嘅電梯離奇意外，無端端向上抽高，結果搞到乘客重傷。港股就上演大戶砌散戶，一砌就唔肯停手，美股創新高，港股借勢又夾高百幾點，仲衝破1月以來的頂部高點。上個月做咗淡倉唔肯投降，大戶就係咁托住唔畀你走，夾到你有氣無碇唞。
6月大市成交疏落，無論美股港股都一樣。最近美國出啲數據，經濟表現唔係咁差，但同樣債息又係咁跌，所以啲人一邊話位高勢危，一邊佢就迭創新高。其實經歷過牛市嘅人都知，呢啲係股市常規，大跌市通常唔會喺人人都有警覺性下發生，當大家都擔心個市好高會調整，往往會掉頭再上。
港股跟升格炒唔起
外圍有利下，港股有啲係跟升，跟升嘅意思係香港自己上升動力唔係咁夠，不過咁啱美國造好，內地出嚟嘅消息又唔差，於是就人升佢又升。點解陸羽仁話係跟升呢？舉個例美國納斯達克指數呢排升咗唔少，納指組成主要係科技股同生化股，概括講係新經濟股，香港相對照嘅影子板塊，可以當係騰訊(700) 呢類網股同濠賭股。美國科網同生化股係增長型公司，成為吸引股民的熱炒股；香港網企同濠賭股同屬增長股，大家都成為熱炒類別。相比之下，呢輪香港網企好似騰訊雖然有升，但炒得顯然唔夠美國科網股咁夠色、香、味啦，咁即係話香港個市，炒嘢資金力度唔及美國，所以只係跟升。
好似睇番昨日個市，借住上月內地PPI跌幅收窄，顯示工業品需求回暖，加上人民銀行昨日收市後宣佈定向放水，同埋美股新高，港股午後抽高，收市飆近200點，創今年1月初以來新高，尾市先略見回順，恒指收報23315點，升198點，成交上番602億元。
大市升近200點，但無乜邊個板塊炒到㷫合合，升幅平均分佈喺幾隻藍籌股。
喺港股離奇衝頂之下，散戶應該點回應呢？陸羽仁建議係五個字︰扶旺不扶衰，意思係乜呢？即係要炒嘅話，都揀啲旺少少嘅落手，好似騰訊，又或者國壽(2628) 呢類可能受國策的股票，唔好貪平揀轉咗勢嘅炒股，譬如濠賭股。
短炒買弱股好易被綁
作出呢個建議，前提係港股家造好有夾倉味道，而且仲係人升佢先升，暫時睇唔到有大旺市，喺呢個分析下，究竟呢個時候仲應唔應該入市，係應該先要諗的問題。
如果投資者睇過自己啲貨唔係咁多，又手痕痕想玩吓，決定咗要短炒吓，咁陸羽仁都建議你唔好走去買啲弱股，主要原因係如果個市未必會大旺，你買吓國壽博炒吓國策消息，或者仲可以搶吓雞胡；如果買弱股擔心未必等到熱錢炒佢，萬一未炒到佢，佢就調整，咁呢啲股可能人升佢跌，人跌佢又跌，買佢咪好唔抵？
好似濠賭股咁，近日好多壞消息，外電又話澳門金管局計劃進一步限制銀聯卡在賭場使用，並已經要求賭場內的珠寶店和典當行，在7月1日前撤掉銀聯卡終端機，以阻塞資金流入澳門，受負面消息影響，濠賭股沽壓重，咁如果你貪平走去買佢短炒，萬一市升佢跌，咁你話點算好呢？
陸羽仁
金融High Tea 舊文