陸羽仁 BLOG 2014年6月20日
老外老細 ２
2014/6/20 上午 09:51:13
網誌分類: 經濟
美國經濟數據靚仔，反映經濟復甦穩步向前。而聯儲局無提加息，主席耶倫繼續唱好寬鬆貨幣政策，市場投資氣氛高漲。歐股造好，美股連升三日後，昨日早段向下，中午在買盤趁低吸納，收市由跌轉升。標普500指數再創盤中及收市新高，收市升2點，收報1959點；杜指收市漲14點至16921點；納指微跌4點至4359點。
美國公布最近一周首次申請失業救濟人數減少6000人至31.2萬，略高過市場預期的31萬，人數繼續維持在經濟衰退前的低水平。有數據顯示美國裁員數量已經逼近衰退前低點，企業開始增聘人手，情況係1999年以來最好的年份，就業持續改善，家庭開支繼續回升，亦收促進消費開支。
另外，費城聯儲報告稱，費城地區製造業指數從5月的15.4攀升至17.8，創2013年9月以來新高，市場則預期的回落至14點。意味着美國的工廠活動指數可能正在加速。同時，美國經濟咨商局報告亦稱，5月領先經濟指標指數升0.5%至101.7，當中10大指數，有7個指數攀升。顯示今年下半年美國經濟經濟將加速增長。
眾多經濟數據表明美國經濟狀況正在好轉。而投資者最驚的是聯儲局沒有提早收緊貨幣政策。而聯儲局主席耶倫在議息會議後大放鴿派言論，提都無提加息問題，表示融通性的貨幣政策、不斷提高的資産與股市價格、持續改善的全球經濟狀況將使美國經濟加速增長。(我就維持一個判斷: 耶倫公開做鴿，但暗中放出加息不能避免的氣球)
不過技術派開始懷疑美股牛市有無力走下去。200日平均綫是技術分析師最常用的指標，跌破這一均綫傾向於顯示市場的勢頭正在減弱。美股連創新高，標普500指數已經連續396個交易日處於200日均線上方，超過1996年和1965年385日的前紀錄。唔少分析已經開懷疑美股漲趨勢能否能夠持續下去。不過，睇股市恐慌指標VIX指數創了7年新低，大市又逢低有買盤吸復的情況，投資者態度仍然非常樂觀。
Hampstead Capital基金經理梵丹(Lex Van Dam) 更話，「耶倫是個超級鴿派。在聯儲局金融操作的幫助下，美國經濟已然復甦。市場趨勢仍是向上。」佢的結論係：除咗將錢投入股市之外，幾乎別無選擇啦。
仲有少少時間繼續講吓職場求生術，早兩日講的老外老細故仔，其實有下集同埋下下集。我早前講有一個朋友在銀行打工，嚟咗個外表係「黄皮白心」的老細David。新老細對佢講「唔好叫我陳生，叫我David。」故事由此開始，朋友同老細David由唔熟變熟，最後以為大家好熟，朋友搵到富豪大客事先都無同老細David講一聲，就在公司公開宣布，最後招老細之忌，送佢上路。
朋友離開公司後，佢原來的左右手一個叫阿John，一個叫阿Jack(為保私隱這些都是假名)，爭住做朋友個「聯席董事」位，最後老細David揀咗阿John升職，大家估揀阿John的原因係佢同老細一樣，都係在美國名牌大學畢業，同聲同氣也。
老細David用人手法一樣，一揀咗阿John上位，又同佢變得好friend，日日放工孖住佢落蘭桂坊，之後仲要食埋飯，放假又叫阿John兩公婆一齊去深圳觀瀾湖打高爾夫，直頭變成私人老友一樣。唔使一個月，阿John的感覺就由新上位戰戰競競，變成心雄氣粗啦。
阿John新升職時佢叫大家飯都唔使同佢食，做嘢就得啦。但三個星期後佢態度突變，有一日下午突然召咗全個部門所有人(當然除了老細David之外)去會議室，聽佢宣佢新上任的鴻圖大計，大家唔知呢個會點解不在阿John上任第一日開，亦唔知點解佢由咁低調180度變成咁高調，不過以後辦公室中人就稱呢個叫「孔雀開屏大會」，咁又幾貼切，因為成個會都係阿John個人表演會，無乜點提老細的指示，講到老細David時只有一句，「David好信我」。阿 John叫下屬呢個點做，嗰個點做，氣熖難當。
下屬們其實唔係幾喜歡阿John，覺得呢啲美國名牌大學畢業生vision多多，講多過做，不及另一高層阿Jack那種實幹型，下屬唔識阿Jack會話埋俾佢地聽點樣做至得。但阿John唔會講(或者佢都唔係幾識)，而且升職後開始講F字出口。
事情變得太快，大家都未搞得清發生乜事，當「孔雀開屏大會」發生後一個月(即係阿John升職後一個月零三個星期)，有一日老細David叫咗阿John入房鬧，跟住愈講愈大聲，不過都係聽不清老細鬧乜，直至最後幾句大聲到所有人都聽到:「Fxxx! 你識唔識做嘢架，而家生意得番以前一半，你仲叫我俾啲時間你，你估我同你好熟呀，有時間我都返屋企陪老婆，出街包二奶啦! 我升你係要你爆數，唔係我幫你追數呀!」(後來在辦公室歷史上，大家開始懷疑老細David係專登大聲到想所有人都聽到)
阿John就此玩完，成為呢個辦公室內最短命的聯席董事。而佢的致命死因，係以為老細David真係同佢好friend，唔知呢種只是David的管治手法，同你friend係俾足所有激勵同支持你，但要你馬上交數，係馬上嗰隻。但阿John卻以為大家真係friend，所以才開心到開那個「孔雀開屏大會」，當然，呢個大會本身，高調到咁，亦係送佢上死路的一個附加因素。
陸羽仁
回應(26) 我想回應
陸羽仁 BLOG 舊文