金融High Tea 2014年6月10日
財主發聲
2014年06月10日
歐洲上周宣佈實行負利率，資金流向美元資產，美股再創新高。港股上周末調整，昨日又回升番百多點，做咗淡倉嘅投資者，暫時仲未有機會平倉。
大市無乜方向，世界盃就快開鑼，大市交投已經跌定先，去到只有441億元水平，指數高開後基本上徘徊，恒生指數收報23117點，升166點；國企指數收報10406點，升65點。交投比較活躍係地產股，長實(001) 及南豐等合作發展的荃灣環宇海灣賣得，本地地產股標青。長實報136.8元，升1.4元；恒地(012) 主席李兆基估計，今年售樓成績料勝去年，股價午後攀升，收報52.8元，升1.2元。東風(489) 獲大行睇好，股價揚5%報12.82元，是國指成份股升幅最勁。
政府的辣招仲未全部通過，當局為了可令立法會支持徵收第二個物業雙倍印花稅，於是收訂為要正式完成交易後先交稅，此舉大大減輕咗發展賣樓阻力，甚至將部份購買力由二手樓趕咗去一手樓，借住呢個消息，地產股先嚟一個小陽春。
九倉計劃加快賣內地樓
大型地產商中，新地、長實兩間公司係最有造勢能力的龍頭，佢哋開盤往往可以牽動樓市氣氛，今次長實打頭陣，成功賣出過千個單位，跟住新地都話會開幾個盤；不過，新地賣樓同長實求量唔同，佢比較求價，當樓市好景時，佢開盤往往推到成個區以至整體樓市上升，但當樓市唔係咁旺，又會唔會影響佢造勢嘅能力呢？所以如果炒地產股係嚟住炒新盤熱，就要一邊炒、一邊留意住開盤嘅反應嘞。
講起地產財團動作，不能不講九倉集團(004) 主席吳光正，昨日一改低調作風，勁彈佔中同削減自由行的建議。中環茶友笑言，早兩年樓市同零售勁旺，吳主席嘅公司賺到笑，佢同時加重中港注碼猛咁買地，?家佢明言內地樓市政策未明朗，下半年速度有需要加快，對內地發展項目投資取態會由積極轉趨保守，認為不明朗因素會維持兩至三年，又表明唔贊成佔中。茶友斷估，九倉呢兩年都買咗唔少嘢，?家內地樓市已經咁，可能大老闆都擔心萬一香港衰埋，痛定思痛下走出來發吓聲，叫人唔好搞到佢檔攤！
上個星期，歐洲為了對抗通縮，落咗劑負利率嘅重藥，市場另一個焦點，係內地除了「定向降準」呢個聰明炸彈外，幾時會用埋減息呢個重磅炸彈，推番郁經濟呢？
外電昨日就報道，內地人民銀行、財政部、發改委等部門已在辯論，是否應當採取包括減息在內的更多措施來提振經濟，但央行至今仍然成功。
人行力拒減息
《華爾街日報》引述官員消息透露，上月底國務院推出微刺激政策的前幾天，負責金融事務的國務院副總理馬凱召集主要經濟機構開會，討論如何讓全國各地企業更易獲得成本更低的信貸。
會上，中國銀監會和發改委官員呼籲降息，但人行官員最終以擔心會刺激信貸增長為由，說服馬凱。最終國務院同意採取有限的措施，其中包括減少企業費用，批准針對小企業的降準措施等手段，降低企業的借款成本，亦即是所謂的微刺激。
從呢個報道去睇，樂觀嘅人會覺得好多部委開始對內地經濟乏力失去忍痛能力，期望中央能夠加大力度去應對，雖然今次唔能夠達到目標，至少睇到北京開始會做少少嘢，去挽救出現持續放緩的情況。
陸羽仁
金融High Tea 舊文