金融High Tea 2014年6月27日
埋數效應
2014年06月27日
借住外圍同內地股市好番啲，港股大幅反彈，其實要升唔使講理由，反正6月就嚟埋數，呢個時候個市升吓，對基金經理來講係大團圓安排。
內地股市回升，帶動港股顯著反彈，全日勁升超過300點，重返兩萬三關上，幾乎以全日高位收市。恒指收報23197點，漲331點；國企指數收報10337點，漲156點，但成交只係回升至526億元。聽內地消息講起，內地上半年增長認真麻麻，個別地區情況相當差，問題係家經濟換檔，做吓微刺激止吓血可以，但勉強出招全面催谷，似乎風險仲大。
臨近七一，澳門政府澄清從未要求在賭場內運作的刷卡業務店舖停止營運或搬遷，濠賭股表現搶鏡。金沙(1928) 收57.2元，上揚4%；銀娛(027) 收59.5元漲3.7%，兩股為升幅第二及第三大藍籌。
零售股成績表麻麻
幾隻零售股公佈業績，寶光實業(084) 3月底止全年業績，股東應佔溢利1.72億元，同比倒退26%。翠華控股(1314) 同期股東應佔溢利1.56億元，同比增長20%，若與去年9月底止上半財年，純利為8549萬元比較，即下半年只賺7054萬元，較上半年下跌17.5%。另外莎莎國際(178) ，股東應佔溢利9.35億元，按年增長13%，仲加派特別息每股5.5仙；不過，公司提醒今季港澳市場的銷售增長由去年28.1%放緩至5.4%，同店銷售則由18.6%放緩至1.5%。而且由於電子商貿廣泛滲透內地市場，傳統化妝品零售商須面對日益激烈的競爭，可見零售商家生意挑戰性幾大。
近排大市炒吓股仔度日，有中環茶友話，投資者遇着呢啲日子，慘過唐僧遇到蜘蛛精，見佢上吓落下，就想郁手炒兩嘢。不過，有時佢都後悔咁樣就會錯過好股。
點解茶友咁講？原來佢近日見到有隻冷門股迭創新高，呢兩日升破10元，喺隻股快要破關之際，佢慨歎自己多年前入過貨，可惜沽早咗，錯過買入十倍股的機會。
茶友所講嘅十倍股，係原本做藥的李氏大藥廠(950) 。茶友當年入貨，係見公司盈利增長不俗，加t上喺科學園設廠，心諗佢攞到政府地皮，應該係正經做生意，至少盤數應該信得過，於是係1.5元入貨，結果升到3元樓上，佢就手痕嘞，開始慢慢沽貨，未夠4元已沽清，點知隻股呢兩年不斷創新高，今個星期開始挑戰10元關口。
悶市換馬要諗真
睇番資料，李氏大藥廠喺2010年上市，主要業務為開發、製造及銷售藥品，主要市場係中國，過去五年公司盈利由4637萬升到去1.5億元，而且增長記錄未中斷過。茶友話，佢家市盈率去到35倍，息率唔夠一厘，加上升咗咁多，梗係打死都唔會追入啦。只不過見佢咁升法，點可以唔揼心啫？
茶友嘅遭遇，相信好多股民都遇過，尤其係5、6月呢啲傳統淡季，好多人就會心思思做吓嘢，有時就會賣咗好嘢！好似茶友呢個「case」，陸羽仁覺得唔需要可惜，因為茶友雖然沽早咗，但都賺得唔少喇，買股最緊要有賺，多少只係次要。不過，佢呢個故事嘅經驗係，股民買股想換馬，不妨先諗諗究竟係換好咗抑或換差咗。
陸羽仁
金融High Tea 舊文