金融High Tea 2014年7月16日
中字輪流炒
2014年07月16日
美股停一停，唞一唞，轉眼又爆上，港股跟住再谷高啲，不過搵到錢的散戶唔係咁多，因為帶動大市向好的火車頭之一為落後重磅股中移動(941) ，睇嚟大戶暫時用緊阿根廷戰術，打穩守突擊，其業務雖然呆呆哋但係派息唔錯的中移動去頂住個市，希望可以睇位入楔「士哥」。
今次世界盃由「德軍」奪魁，演出可謂實至名歸。有個茶友話，?家好多體壇演員(好似財經演員)都做咗事後孔明，又話德國磨劍十年、又話佢青訓成功。佢始終相信足球係圓的，最後都係講運，如果唔係咁充滿不確定性，又點會咁多人鍾意睇波呢？(但我覺得德軍都有佢的紀律與組織，好運氣到來先接得住。)
炒作和黃 當買歐股
講到運，茶友話德國上次奪世界盃係二十四年前，當時東、西德宣佈合併，全球對呢個新興巨人充滿期望，喺呢種氣勢下，西德靠「三劍俠」馬圖斯、奇連士文同布林美贏取世界盃。當時陸羽仁為見證柏林牆倒下，剛好在德國旅行，睇住佢哋捧盃，仲帶咗一大袋柏林牆石頭回港，後來西德為了支援東德，承擔大量福利，捱了一輪黑暗日子，同時亦係德國足球的低潮期。德國人的團結，終於令兩德成功合併，至今德國仲享受緊合併帶來大量低廉而高質勞動力的紅利，令佢隱隱然已成為歐盟領袖，今次德國贏取世界盃，首相默克爾一直紅衣撐場，呢個首相有料到腳頭又好，德國國運會否乘時而興，亦成為一時話題。
輪到改革概念發威
當歐洲人注視緊世界盃的時候，葡萄牙最大上市銀行傳出陣陣燶味，令到區內股市波動，呢個情況牽引到今年表現強勢和黃(013) 都出現調整。和黃股價反應說明佢同歐洲市場存在同步關係，茶友話，如果你信歐洲會因為債務問題持續量寬，?家係買歐股時候，咁和黃可能係港股裏面便捷的替代目標。相反，如果對歐洲前景睇唔通，咁就要觀望啦。
市場再炒國企改革消息，最早傳呢個概念的中石化(386) 漲1.25%，造7.3元，升幅算是小兒科。新傳出中糧集團、中國建材集團及中國醫藥集團等六間央企，成為國企改革試點企業，旗下本港上市的中國建材(3323) 、中糧油(606) 、中國食品(506) 及國藥(1099) 都急升。中國建材升5%，造7.56元，升幅是國指成份股最標青；中糧油飆7%，造3.38元；中國食品爆升17%，造3.36元；國藥(1099) 都抽升5%。
從早排開始炒AH股差價，到?家炒改革概念，似乎個市有錢係中資股身上輪流炒作搵食喎。
有報道話內地上月新增人民幣貸款過萬億元，廣義貨幣供應量(M2)增長加快至14.7%，社會融資規模按年急增90%以上。興業銀行首席經濟學家魯政委認為，與中央穩增長政策有關。若外匯佔款(即因外資流入而需要增發的人仔)數量持續低企，人行有需要增加市場流動性，但不一定要減息、減存款準備金，還有其他工具可放水。睇嚟內地已經唔想將銀根收得咁緊啦。
陸羽仁
金融High Tea 舊文