金融High Tea 2014年7月2日
摸底
2014年07月02日
七一港股休市，假前恒指係半年結一度波動，恒指曾倒插達261點，低見22960點，但兩萬三支持韌，抝腰彈番上去，跌30點，半年結最終23190點收場；國企指數收報10335點，升27點。
金管三度入市穩匯
另外，半年結剛過，但不減市場對港元的需求，港匯昨日數度觸及7.75強方兌換保證，令金管局單日三次出手，合共向市場沽出93.16億元以穩定港匯，為2012年12月相隔19個月後再度入市。
港元需求增加，望要是企業以港元派息及併購所致。新資金流入港元，自然要搵路走，港股隨時受惠。
今年港股年頭唔係旺，跟住跌咗落去，本來傳統「五窮」反而升千幾點，加埋六月高位企住，結果半年只係微跌。
中資股爆小冷門
同樣，上半年邊啲股份有表現，一樣估佢唔到，被人睇淡的內銀股期內升得唔錯，另外能源類舊經濟股都有得升，好似「三桶油」中石油、中海油、中石化都有不同幅度的進帳。內銀同三桶油有一個共通點，就係「大件夾抵食」，兼且喺成個經濟環節中佔有不可替代的功能，所以喺壞消息包括內地樓市轉差或者喺管理層涉及貪腐下，反而造就低位買貨機會，不過呢啲就唔知算唔算股神巴菲特所講，人哋恐懼我貪婪啦！
有人會話，經濟差阿爺就會催谷，譬如話放水啦。猛人就話暫時睇唔到喎，而且有個顧慮喺當下行周期，中央就算推出刺激方案，效用亦有限，屆時豈不是仲「濕滯」？而且家唔再似溫總年代咁鬆手放水。聽完佢咁講，投資熱情難免涼咗一截。不過，喺解讀負面消息時大家不要忘記，股市通常係走喺經濟之前，家情況咁差，但最重要係未來有無改善，所以下半年內地可以話係「摸底」階段。
之前我講過，家好多基金或投資者，手頭現金都比較充裕，皆因大家都知內地情況唔係咁靚仔，紛紛增加手頭現金，確保投資的安全系數，所以關鍵係要等到幾時，當實體經濟調整去到差唔多，個市就有機會好番啲。
地產股要靠貨如輪轉
有爆冷味道的唔止中資股。港府提出修訂雙倍印花稅(DSD)變相減辣，令本地地產股翻生，當中信和置業(083) 年初至今股價累升20%，榮登上半年藍籌升幅之王；荃灣環宇海灣銷情佳，造就長實(001) 上半年升18.54%，為藍籌升幅第四勁。
根據上半年賣樓數字，去年樓宇銷售未能達標的長實今年急起直追，過去六個月售樓超過二千伙，成為銷售冠軍，其次新地賣樓有千五伙，成績都唔錯，跟住係恒基，另外新世界、會德豐同信置都推咗唔少樓。政府喺假前宣佈新一季賣地計劃，推出單位數目五千伙，發展局話明唔會行高地價政策，即係話有人入標就會去貨。
由於土地短期不愁供應，相信大發展商會傾向貨如輪轉，估計下半年會繼續行不停推盤策略，由於地產股股價跑喺賣樓之前，未來股價要維持，必需要樓盤銷情繼續好。
陸羽仁
金融High Tea 舊文