金融High Tea 2014年8月1日
跟住內地走
2014年08月01日
美國聯邦儲備局主席耶倫喺兩日會議後，一如預期再減買債100億美元，我喺網誌用咗大鴿嚟形容耶倫。
大鴿派話結束買債後，會維持超低息一段時間，雖然佢係咁講，但我就覺得呢樣嘢係一半半，主要都係睇美國數據跟住點走，如果數據維持好似近排持續咁靚仔，唔排除佢喺適當時間出口術，調整預期早啲加息。
美息易升難跌，但係咪代表美股咁快見頂呢？呢點美股策略員有不同意見，牛派認為加息係經濟強健表現，至少喺加息初期，股市仲可以維持榮景。咁講當然唔係話大市會直線上升啦，但亦唔係話一聽到加息，個市就會玩完，一個可能係耶倫出口術，個市跌一跌，跟住當佢無嘢再炒過，到加息加到咁上吓，股民如夢初醒，大市先至冧檔，一切都要睇吓耶倫口技有幾高嘞。
龍頭內房龍咁威
大市昨日呈膠着，膠吓膠吓借住內地股市向好升番24點，本港地產股升完後，輪到內地地產股升，最標青係幾隻龍頭大股。
內地多個城市放開限購，《第一財經日報》報道，寧波昨日加入放開限購行列，令全國46個限購城市中，約30個城市實際上不同程度開始鬆綁政策。寧波市住建委稱，自今日起，購房不再需要提供家庭住房情況查詢證明。
下午內地市況好轉，內房A股造好，呢個板塊本來唔係咁得，家都有資金殺到，搞到香港掛牌的內房股午後都借意走高，中國海外發展(688) 大漲4.6%；華潤置地(1109) 升3.6%，兩股成為上升最多的藍籌；其他二線內房股都有跟炒跡象。喺內房股炒作下，恒指收報24756點，升24點；要留意係成交額由昨日過千億元減少至840億元。
瑞銀將港交所(388) 列入「最不推薦股份」，目標價150元。瑞銀發表研究報告話，雖然「滬港通」即將啟動，投資者氣氛仍正面，但憂慮「滬港通」對港交所每股盈利的影響被放大，市場對今明年每股盈利的預測太高。短期而言，7月份的交易量是年中最低，過往港交所的股價與每日平均成交量掛鈎。港交所基本因素麻麻，呢樣嘢唔係新鮮事啦，陸羽仁已經講過，根本唔算特別，只不過如果佢想調整，就可能借啲嘢跌吓。
券商保險股翻炒
港股呢排都好受A股影響，滬深股市昨日先跌後升。雖然人行進行260億元人民幣正回購，全周淨回籠資金110億元人民幣，不過A股IPO申購資金回流股市，市場續炒滬港通、國企改革等概念，藍籌板塊經過昨日整固後，重展升浪，推動大市向上。資源股午後發力，推動大市顯著上升，上證指數重上2200點收市，再創今年以來收市新高。
由於個市受A股帶動，本地券商股、內險股以及A股ETF個別炒上。國壽(2628) 報23.35元，上揚1.7%；人保(1339) 升2%。國泰君安(1788) 漲4%；申銀萬國(218) 飆6.6%。安碩A50中國(2823) 上揚3%，總之大家就跟住內地走。
陸羽仁
金融High Tea 舊文