金融High Tea 2014年9月17日
留意跌穿軌
2014年09月17日
港股嘅議息恐懼症，睇嚟嚴重過美國好多。聯儲局開會傾利率去向前，美股只在萬七點上上落落，沽壓唔算太嚴重，但港股就插完又插，原因有幾個，一是香港地產股同內房股佔港股比重大，對息口比較敏感；二是港股之前追落後升得多，指數創咗幾年高位，於是一沽落嚟會跌得比較快；最重要係大戶喺呢個時間，似乎想先殺咗好友祭旗，於是趁個市插低就一直殺落去。
個市跌得咁急，如果美國議息無乜好大驚嚇，有啲反彈都唔奇。如果拎個圖睇長一啲，會發覺個市跌穿咗上升軌，究竟呢個係咪假跌破，要觀察一下，如果個市因為超賣反彈，就要留意喺24800點左右會有幾大阻力，如果無法上破番呢個阻力，咁個市就唔係咁靚仔嘞，所以就算係博反彈，都要留意條軌有無被破壞囉。
A股基金有人散水
港股近日變番潺仔，除咗話加息威脅，市場再度關注內地經濟狀況係另一大原因。中國8月外商直接投資(FDI)按年跌14%，連續兩個月下跌，跌幅差過市場預期，影響咗投資者對A股的信心，引發恐慌性拋售，加上中證監核准11間企業的IPO首發申請，對市場資金造成壓力。上證指數午後急挫收報2296點，跌42點；創半年最大單日跌幅；深成指報7921點，跌191點；創業板指數瀉逾3%，整體A股成交仲創近四年新高。由於A股高成交急挫，本港上市的A股ETF大跌，安碩A50中國(2823) 報9.15元，挫2.03%；南方A50(2822) 跌1.88%，造9.41元，搞到中資股氣氛都幾差。
內地電訊股呢排轉勢幾急，主要係蘋果新手機一直未有開售嘅消息。內地傳媒引述消息報道，蘋果公司已將內地市場的備貨計劃暫停，原本可於本月內搞掂的新版產品入網許可證已告吹，重新申請日期未定，iPhone 6或要待2015年才能在內地上市。
除熱賣手機上市無期外，昨日再加一單，就係由幾大網絡商合作的鐵塔公司，其董事長劉愛力接受內地傳媒訪問時表示，目前各省份公司處於「六無」狀態，包括無資產、無人員、無機構、無設施、無流程、無制度。他仲爆話，鐵塔公司具體何時可以投入運營，目前還沒有時間表。三大電訊股，中移動(941) 挫3.8%，造94.95元；聯通(762) 急跌4.53%，是表現最差藍籌；中電信(728) 仲跌夠4.85%。
中石化好嘅唔靈衰嘅靈
中石化(386) 今個星期跌到一仆一碌，主要係私有化儀徵化纖(1033) 被看成執咗個大包袱，加上銷售業務引入新基金股東，市場反應負面，主要係覺得新股東好多都係基金，對拓展業務無直接幫助。不過，今次引入股東後集團透露了三年上市大計，照計應該有助反映價值，無奈係個市跌開，對利好消息無反應，對負面嘢就加倍奉還。不過，如果佢跌穿7元，調整幅度已經好深，基本上抹咗先前累積的一大截升幅，理應唔使睇得咁淡啫。
陸羽仁
金融High Tea 舊文