陸羽仁 BLOG 2014年11月14日
樓梯上 電梯落
2014/11/14 08:41:19
網誌分類: 經濟
美股輕微收高，繼續窄幅波動，變化不大。杜指漲41點至17653點；標普500指數微升1點，收報2039點；納指漲5點至4680點。
歐洲股市造好，提振市場情緒，美股朝早造好。石油輸出國組織(OPEC)下調全球石油需求預期，指原油需求將每日減少100萬桶至2920萬桶。其中，俄羅斯和中國的需求連續兩個月遭下調，主要原因係全球經濟正在放緩。消息令已經疲憊不堪的油價進一步受壓，紐約12月輕質原油期貨價格昨日再跌3.8%至每桶74.26美元，創了四年以上新低。油股再插，Chervon及Exxon Mobil分別跌1%及0.8%，拖累大市由升轉跌。
油價近期大幅下滑，有分析揣測係「油價戰」所致，指有人要打擊俄羅斯石油產業或阻撓美國頁岩油產業的發展。昨日沙特阿拉伯石油部長納伊米發言，油價下跌與政治無關。高盛則表示，油價繼續下跌，正正反映市場已認定OPEC在會議上不會減產，但預期紐約油價唔會跌穿成本價每桶60美元，因為油價一旦跌近70美元邊緣，鑽油商將會減少投資，供應減少，油價又會得到支撐。
大市午後跌幅收窄，尾市收復失地，主要原因係受到全球最大零售商沃爾瑪第三財季營收及盈利都好過市場預期的利好消息帶動。沃爾瑪昨日大升4.7%，係表現最好的杜指成份股。主要零售股造好，反映美國經濟嘅支柱零售消售，表現理想，加強了投資者對後市的信心，支撐大市再度轉強。
值得一提嘅係，CNBC的《Futures Now》節目昨日訪問有「末日博士」之稱嘅麥嘉華(Marc Faber)，主持人重播麥嘉華於兩年前的訪問片段，佢當時話估計在未來6至9個月，美股將會大跌兩成，所以佢手持大量現金，等執平貨。結果大家都知啦，標普500指數無好似麥嘉預期咁跌落1160點，反而大升40%至2040點！節目主持人問麥嘉華，今時今日，仲會唔會堅持當日嘅睇法，標普500指數仍會返番去當日預測的目標？
有趣嘅係，麥嘉華無舉白旗投降，亦無承認自己睇錯市。只係話「任何事都有可能」。又話自己其實無睇錯市，事實上，很多股票的股價，相對於兩年前，其實已經由高位下跌了兩成，只係某幾隻股票大升，推高了指數，這解釋了為什麼很多基金經理的表現都落後大市，因為佢哋手上嘅股票都跌曬價。佢又提醒投資者，這三年以來，股市已經漲了一倍。如果投資者相信股市可以每三年漲一倍的話，就去買股票吧，而佢唔會相信。麥嘉華補充，聯儲局的措施幫助推升股市，但市場力量終有一天會擊垮聯儲局，市場力量將會逆轉。「凡事都有可能」，他相信大市仍有類似當年1987年的股市，出現顯著的回落的風險。
我覺得股市必定有周期，問題係周期的時間有長有短而已。估市最難之處亦在於時間的掌握，麥嘉華就係估早了兩年甚至三年的時間。隨著大市愈升愈高，回調的風險就必然愈大，股市唔可能只升不跌，如果佢依家至估在未來6個月至9個月大市會有明顯回調，準繩度又會高好多啦。有句形容股市幾貼切的說話，「股市就像是走樓梯上樓、搭電梯下樓」。睇美股近期的情況，離落樓的時間想來唔會太遠，大家千萬不要掉以輕心。
陸羽仁
回應(1) 我想回應
陸羽仁 BLOG 舊文