金融High Tea 2014年11月14日
拗手瓜
2014年11月14日
外圍唞氣，港股焦點去返亞太會議，中國表明要走出去，以支持區內建設為主軸的海上絲路計劃拋出來，外界形容為中國版馬歇爾計劃，再加上自貿區啟動令巿埸氣氛似有改善，雖然內地股巿牛皮，令港股升幅細咗。但市場憧憬更多地方設自貿區，早兩日提過的港口股近來連日受捧，廈門港(3378) 連升四日。
內險股借勢炒
恒指收報24019點，升81點；國企指數收報10800點，升71點，成交金額839.3億元。藍籌股港交所(388) 繼續搶鏡，創咗52周高位，高見187.2元，收市升1.41%報187.1元；另一隻友邦(1299) 都創新高，曾見45.15元，收市升1.24%。被指係內地股民心中有獨特形象的銀河娛樂(027) 跑贏一眾藍籌，全日揚3.13%。
不過，大價股以內險最搶鏡，中國太平(966) 旗下首十月保費收入升23%，股價受追捧，抽升11.04%收造17.7元。內險股有勢，相信同A股大漲小回好有關，所以其他內險股普遍升。平保(2318) 走高2%造60.55元；新華保險(1336) 飆7.87%造32.2元，是最標青國指成份股；太保(2601) 升3%造29.75元；人保(1339) 漲1.73%造3.52元。國壽(2628) 因為H股比A股有折讓蝕咗底，股價升咗1.3%造23.3元，買中佢真係有小小揼槌仔。
油價續跌，搞到三桶油腳仔軟軟之餘，有石油收益的和黃(013) 都乏力。有熟悉情況人士話，油價咁冧法，短期油價都係無乜力，最多呆喺度，所以油股難炒，反而航空股可睇多眼。
除了股市，樓市近日都有升溫跡象。呢兩日消費者委員會發表調查，質疑新盤銷售手法，話發展商賣樓仲有用「唧牙膏」同「發水票」手法促銷。有人就捉路，話現任消委會主席被外界指是「梁粉」同財團拗手瓜，呢次高調公佈調查，仲提出話要修例收緊新盤賣樓，咁係咪代表政府想再勒緊賣樓呢？對於呢個估計，無人係特首同消委會主席肚裏條蟲，唔敢講佢係咪想對樓市拳打腳踢，狠狠打擊。不過，從正路嚟講，新盤銷售通過咗只係一年多啲，通常好少會話咁快修訂，而且都見唔到社會或尊貴的議員對條例漏洞有乜質疑，突然間消委會咁主動做嘢，外界有此估計亦都好正常。
陸羽仁早前同地產界高層傾起，佢話今年發展商賣樓相當厲害，估計會遠超去年。舊年賣樓賣得少的長實(001) 、新地(016) ，今年好有可能會大收旺場，遠超去年數字，最重要係部份高價投番嚟的地皮，都有機會賺錢出貨。發展商吸飽水，日後不止有充足彈藥投地，而且仲可以喺市道唔係咁就時，拖住唔賣樓。發展商賣樓賣得咁好，政府會覺得同佢哋賣樓手法識得點樣營造氣氛同催谷買家決定有關。當然，發展商唔係無牙老虎，當局要條例加強管制賣樓唔係講就做到，但消委會擺出嘅姿態，都有揚聲示警的味道。由於?家好多地產商仲部署緊賣樓，唔排除雙方會陸續交手。
陸羽仁
金融High Tea 舊文