魚樂無窮：第一炮載通睇升22%
■筆者今年頭炮推介載通。圖為集團主席梁乃鵬。 資料圖片
2015年第一次同戰友見面，先祝大家股運亨通。去年頭炮耐世特（1316）最多曾升71%，埋單升五成，跑贏大市一條街，可喜可賀。今年頭炮推介載通（062），目標價20蚊，潛在升幅22%。
推介載通原因兩個字︰油價！國際油價自去年中見頂回落，單計下半年喪跌49%，直插冇水花。政治因素令油價疲不能興，油組人士預期，未來數月油價將處於60美元或更低水平，載通燃油成本肯定慳番一大筆。翻查資料，載通上半年燃油成本按年減少6%至7.1億銀，公司指巴士營運效率提升及平均燃油價格微跌，令燃料成本減少；事實上，上半年國際油價仍有一成升幅，公司依然搞得掂，下半年成本大跌，核心業務值得寄予厚望，假設燃油成本減少一成，已可帶動盈利增長五成，非常和味！
作為一間巴士公司，載通亦手持大量巴士廠地皮，喺寸土尺金嘅香港，更顯珍貴，荔枝角車廠成功升呢做曼克頓山，就係一個好例子。載通現時仍持有曼克頓山平台商場「曼坊」業權，另於荔枝角及屯門持有工商廈物業，每年均有穩定租金收入；另外亦於新地（016）共同持有觀塘工業用地，面積達115萬平方呎，未來觀塘變天後，地皮價值隨時高過公司現時66億元市值，趁仲trade一倍PB樓下入場，兼有近四厘息打底，值博率甚高。
唐牛
https://www.facebook.com/tongcow88
唐牛
魚樂無窮 - 唐牛 舊文