中環在線：六股評人新年鬥眼光
一人醒你一冧巴
■六位股評人各有心水股份冧巴，睇下邊個年尾跑出。
新年快樂！今日係2015年第一個交易日，睇得財經版，大家應該最想睇下今年有乜投資貼士，畀冧巴就最實際，不如嚟個「一人一股」，華華搵咗6位股評人，每人畀一個冧巴出嚟，講明係睇一年回報，到今年年尾再幫佢哋計數，睇嚇邊位揀嘅心水股升幅最勁，揀中冇獎。
沈大師鄧聲興睇好A股
由於A股喺舊年年尾嘅升勢太過淩厲，多位股評人基本上都係捉住呢條路，人稱「沈大師」、有時燈燈哋嘅沈振盈揀南方A50（2822），事關佢估滬綜指今年會爆升七成至1倍，即係有機會升上5000至6000點，挑戰2007年6092點嘅高位，佢仲話，呢個估算一啲都唔誇張喎。
靚佬股評人鄧聲興亦都係睇好A股，佢揀中信証券（6030）。其實佢個心十五十六嘅，佢覺得券商股同保險股都好，最初想揀國壽（2628），叫佢買定離手，就撲槌揀中信証券，指呢隻股可以受惠於A股交投大增，估全年升25%。
咁都唔係人人都鍾意中資股，周顯、孫柏文就有另類選擇提供。
周顯推介正在停牌嘅華人策略（8089），問佢點解揀隻冷門創業板股，佢就故作神秘，話當中有好多來龍去脈同埋大製作，好難三言兩語講得曬喎；咁都係等隻股復賽先講喇。
孫柏文就睇好《忍者龜》嘅產品銷情，話女孩子鍾意《魔雪奇緣》，男孩子就偏愛《忍者龜》，賣《忍者龜》產品嘅彩星玩具（869）將會有運行咁話。
「青姐」胡孟青與「陸叔」陳永陸今次就好啱key，咁啱都係揀舊年12月上市冇耐嘅半新股，青姐揀中國前首富王健林隻萬達商業（3699），話揀股只要企啱邊就掂；陸叔就繼續推中廣核（1816），佢最近不時喺電台節目推呢隻，好鍾意核能概念咁話。
嗱，華華講明呢個係冇獎遊戲比賽，純粹新年嚟個新搞作，又睇下邊位股評人眼光準，即管睇下到咗年尾，邊位可以帶挈大家食大茶飯嘞。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文