陸羽仁 BLOG 2015年1月2日
經濟好年頭
2015/01/02 09:11:24
網誌分類: 經濟
2014年最後一個交易日美股先升後回。杜指早段重上18000點水平，午後腳軟，收市倒跌160點至17823點；標普500指數跌21點，收報2059點；納指跌41點至4736點。當日只是成交量低的回吐，無乜特別負面因素。
去年，杜指累積升幅7.5%；而標普500指數及納指分別升11.4%及13.4%。單睇去年，美股看來唔高，但唔好忘記，對上一年2013年美股其實已經升得好勁，納指飆升38%、標普500指數亦勁升30%。跟住2014年在大漲年之後無調整，仲有超過10%升幅，美股去年表現確實不俗。
美股去年之所以能夠保持堅挺，主要歸功於兩大原因，首先係長期利率能夠維持超低水平，美國10年期國債息口在年初時的3厘，已經係全年最高，年底更跌至大約2.16厘(大家唔好唔記得德國10年債更跌至0.54厘的超低水平)；另一個因素係原油價格在年內暴跌超過五成，年底收市每桶53.27美元，據估計，美國人去年在能源消費上因油價跌節省了接近140億美元，大大刺激了美國人的消費力及消費意欲。美國GDP有7成來自零售消費，美國經濟好轉，唔難理解，另外話美國因為油企收益而唔想油價跌的分析，我從來都唔認同。
踏入2015年，今年大市又會係點呢？市場人士普遍認為受惠於低油價，美國經濟在去年，尤其係下半年終於迎來強勁的復甦。美國第二季GDP增長年速增長4.6%，第三季再增速至5%，花旗集團預期美國第四季GDP增長會回落至3%，但今年首會回升至4%，表明今年經濟將會繼續向好。
據CNBC統計15華爾街頂級分析師對今年美股的平均預期，標普500指數目標價為2222點，距去年收市仍有6%的上升空間。
分析師仍然睇好今年大市，主要原因係認為美國去年新增工作崗位接近300萬份，係自1999年以來的最大增幅。過去三年以來，美國國內失業率從8.6%下滑至現在的5.8%。就業市場復甦的趨勢勢必延續至2015年。專家預計2015年底，美國失業率將降至5%-5.5%的水平內。而工作崗位的增加，再加上低油價，將繼續刺激美國零售消費，預計會拉動美國經濟自2005年後再次實現超過3%的經濟增長。
不過，又唔係所有分析對美國經濟以及美股都咁樂觀，明尼阿波利斯聯儲主席Narayana Kocherlakota及聯儲局一些經濟學家日前發出警告，話過去幾年來美國的平均通脹水平只有1.5%，據經濟學家研究認為，明年通脹跌落至1%以下的概率達到了72%，為5年最高。市場出現通縮的概率正在增加，美國家庭對於通縮所帶來的成本走高預期也在加大，值得政策制定者留意。
今年是美國加息年，預計最多加息幅度是1厘，經濟增長好應承受得到，若然出現通縮風險，聯儲局會推遲加息或減少加幅，只要不是通縮得太快或太厲害，影響暫時不大。所以美股整體基調仍然向好，只是怕升得多有啲回吐。
陸羽仁
回應(6) 我想回應
陸羽仁 BLOG 舊文