金融High Tea 2015年1月2日
同股唔同命
2015年01月02日
2014年港股最後一個交易日以升市收爐，對股民來說應該係好兆頭，因為臨尾指數高番些少，似乎基金並未落雨收柴沽貨走人。杜指最後一個交易日下跌，無法企穩萬八點樓上，但全年計升逾7%，是第六個上升年頭。傳統上，1月係美股旺季，內地股市假前仍見牛氣，新一年開局，希望港股扭轉上年最後一段的弱勢！
強股轉弱高追摸頂
收爐之前，阿爺仲整煲大茶飯出嚟，南北車宣佈合併方案，南車(1766) 食埋北車(6199) 變中車，雖然大家換股作價平過停牌前收市價，但市場就認為呢單係好嘢，復牌相關股份股價全部爆上三成有多，如果唔係有呢煲大茶飯，港股係咪可以升市埋數都係未知之數。
南北車合併傳咗好耐，停牌後鐵路股借「一帶一路」概念大炒，兩股復牌後爆上有補回停牌期間升幅的味道，結果北車爆升45%，造11.12元，係最勁一隻；南車大升32%，造10.44元；旗下南車時代(3898) 都炒高35.68%。恒生指數喺佢哋帶挈下收報23605點，升103點；國企指數收報11984點，升140點，成交439億元。
有人問仲追唔追得過，由於佢點計都升咗咁多，短期好可能有回吐壓力。至於長遠前景，就要睇你對中國大搞基建外交有幾大信心。以基本質素計，賣車風險點都低過去幫人起路，加上今次合併，最大目標是減少兩間國企自己人打自己人，少咗出外國搵生意時惡性競爭，唔使兩間中國公司自己鬥低價，長遠對公司發展有利。中國的國策是走出去，暫時仲未有乜高科技產品，但中國高鐵規模世界第一，輸出高鐵有賣點，家兩間公司夾埋減少競爭，對股價自然有利，所以如果要買高鐵概念股，車股照計可以秤先啲，但高追就有風險。
上年港股全年埋單只係升咗二百幾點，如果最後一個交易日唔係升市而係跌市，咁港股變成少數下跌股市都唔奇，如果抽走升得多的國企股同地產股，其實好多本地股都要跌。雖然恒指只係微升收市，但睇番全年波幅有四千多點，上上落落幅度唔細，只不過大市落完又上，上完又落，到年尾指數又變番同去年差唔多。
睇番個股，上落波幅仲厲害。好似今年跌幅入三甲的金沙(1928) ，全年跌幅39%，高低位差不多相距43%。濠賭股於2013年係最標青板塊，假如去年年初見佢強勢追入，咁就不幸摸頂，同買一隻股，相差一年條數就唔同晒。
睇番過去一年，濠賭股首個凶兆，陸羽仁當時嘅澳門朋友已在本欄率先同大家爆料，話稍後賭牌續期，未必係咁長，當時感覺係中央想收緊對澳門博彩業的控制，呢個消息傳出之際，濠賭股即時無乜反應，仲係炒到㷫烚烚，但好快就已經見咗頂。各種關於中央勒實澳門博彩業的消息紛至沓來，同一時間見到澳門博彩收益高增長不再。賭業公司估今年上半年續差，下半年會好番，但照家情況嚟睇，呢類股份仲未算係真正抵買。
油氣股靜待大茶飯
如果講大上大落，石油股今年不比濠賭股遜色，三桶油喺上半年表現唔錯，但隨着能源價格急挫同石油系統被清洗，股價在年底急滑，如果高位無獲利，咁下半年就輸突。相比三大龍頭巨企，系內另一成員昆侖能源(135) ，由於撞正能源價格下跌加上領導頻頻被查，股價幾乎由年頭跌到年尾，成為藍籌表現最差一員。
昆能話晒係國企，以目前市盈率只有8倍，息率超過3厘，用油氣股估值遠低於市場平均，反映咗市場對風險的預期。同博彩業唔同，能源係國家安全不能缺失的環節，三桶油呢個級數的企業係大到不能倒的公司，有預期今年氣價還會再大插，耐心啲等佢跌到咁上吓，呈現低撈價值，而且呢啲可能係賺到較深利錢的投資機會！
陸羽仁
金融High Tea 舊文