中環在線：環保？慳家？咪煩？專一？
楊受成細仔鍾情黑褸卡其褲
■唔知楊政龍會唔會請教下鄭志剛嘅衣著打扮呢？
每人有不同衣著風格，富二、三代亦唔例外。英皇集團老闆楊受成27歲嘅孻仔楊政龍（Alex）似乎特別鍾意黑褸襯卡其色褲，近兩個月見佢多次現身英皇新盤嘅記招，次次著到一模一樣，夠曬專一，唔通佢嘅冬天衣櫃只得呢兩款衫褲？
自嘲似英皇打雜嘅Alex，喺美國波士頓大學修讀商科，約兩年前加入英皇，係英皇集團企業行政主任。最近兩個月佢十分勤力，跟住公司元老張炳強（Donald）密密現身，出現得最密嘅地方，就係英皇新盤西環維港峰嘅記招。
呢個新盤搞咗超過廿次記招，一半見到佢，可惜佢每次講嘢都唔多，主要都係大合照時同Donald一齊影相，或者頒獎畀合作夥伴，可能Donald暫時唔想畀學緊師嘅Alex太大壓力喇。
特別嘅係，Alex每次出現幾乎都係一件黑色褸配條卡其色褲，有圖有真相，由舊年底開示範單位，到除夕帶傳媒去到黃竹坑睇廚具，噚日跟地產代理玩遊戲，Alex都係咁樣著。
鄭志剛襯過先出門口
知情人士就話，其實Alex次次件衫都有「些少」唔同，絕對係有換衫嘅，只係Alex特別喜歡黑衫撞卡其色褲，睇起上嚟咪差唔多囉。
要對比嘅話，富二、三代當中，新世界發展（017）主席鄭家純嘅長子鄭志剛（Adrian）就出名比較貪靚，雖然佢每次現身都係西裝一套，但係睇得出佢出門口之前，一定花過心思，恤衫、西裝、西褲、袋巾全部一絲不苟，顏色同款色全部襯過曬，好少見佢一般行政人員look。可以想像，佢有一個敞大嘅衣帽間，仲要放滿彩虹七色嘅衣物，十分醒神。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文