金融High Tea 2015年1月8日
對沖延後效應
2015年01月08日
油價下跌，成為去年尾、今年初市場焦點之一，美股借頭借路連跌兩日，港股插完之後回升，有先跌後喘穩的味道。油價下跌令到美國能源股急挫，拖低美股。中東油國大臣話美國石油生產商做咗對沖保護，應該可以撐多一季，之後就見真章。
航空股新年好開始
油國大臣咁講，第一點係暗示油價首季好難回升；另一點就係有人會喺高位接咗貴貨。咁邊啲人會買貴油呢？答案其中一個係用家，譬如話航空公司。
如果你有留意，油價初初插落去，普遍航空股反應都唔算大。本來原油支出係佢哋一大開支，成本咁跌法，豈不是好肥仔，但佢哋起初升得唔算多，主要係因為航空公司一般會為燃油做對沖，在期貨市場買定部份要用嘅油，所以油價下跌，航空公司不會全面即時受惠，仲有可能因為要為對沖一下子撥備影響盈利。
不過，中東油國大臣暗示油價短期無得好，即係油公司賣咗貴油期貨期權清晒數後，油公司開始要捱。航空公司做油價對沖，唔只係貴價時做，喺平價時應會更積極買入平油期權鎖定成本，所以今年上半年，航空公司的燃油成本支出會真正回落，開始令業績受惠。可以估計，航空股3月宣佈去年業績，未必會反映低油價好處，到9月宣佈今年上半年業績時，就可以反映嘞，所以呢兩日見到幾隻航空股，對油價回落的消息反應開始強咗。
昨日國航(753) 升4.5%，造6.94元，跑贏一眾國企成份股；南方航空(1055) 揚3.5%，造4.19元；東方航空(670) 升3.3%，造4.08元；國泰航空(293) 升3.8%，報16.96元。在幾隻航空股中，東航遲啲可能炒埋上海迪士尼開幕，有可能「秤先啲」。
油價再插的震撼對港股影響唔算大，恒指昨日先跌後升，特別之處係扭轉近月國指強過恒指的表現。恒指全日收報23681點，升195點；國企指數收報11991點，微升不足1點，顯示早前升得多的國企股繼續整固，反而之前較弱的騰訊(700) 與中移動(941) 為升市功臣，合力推動恒指升131點。騰訊收報124.4元，升3.7%；中移動走高3.4%，造91.75元，大市成交略縮至1026億元。
近日中央大力推動金融改革，總理李克強去巡深圳後發話要推深港通，反映內地要改革的步伐行得好急。前全國人大財經委副主任賀鏗表示，中國經濟現時最大的隱憂是出現經濟滯脹，認為擴大投資對刺激經濟已經沒有效果。他指今年經濟增長目標不宜改變，建議維持約7.5%的目標。
稀土股炒心理
賀鏗接受外電訪問時強調，由於長期過度投資，中國目前面臨最主要的問題是經濟滯脹，預計滯脹仍會持續三至五年。他認為，中國擴大投資對刺激經濟已經沒有效果，需要靠加快創新步伐，調整經濟結構。而且他仲擔心中國的地方債和影子銀行，積累很多隱患，加上房地產存在高槓桿、泡沫化的特徵，形成金融風險。賀鏗說法同好多外資唱空中國的觀點相差唔遠，問題只係阿爺會唔會任得佢爆煲囉。而且加快改革，有利經濟重拾動力。
由於世貿組織仲裁輸咗，中國被迫取消稀土出口配額政策，周初狂飆逾三成的中國稀土(769) ，昨日接力再升16.5%，造1.62元。不過，配額取消不代表一定有生意，家全球經濟放緩隱憂未散，美日等用家積極開拓新供應的策略未必因今次結果就打退堂鼓，喺咁嘅情況下，相關公司股價升咁多有炒市場心理成份，高追就要留意風險，反而有貨在手者可以諗吓係咪食胡先？
陸羽仁
金融High Tea 舊文