中環在線：惠理畀錢炒股兼揀蟀
科大生實戰 賺得多可加盟
■科大生可以利用惠理資金實戰炒股，認真唔錯。 設計圖片
踏入羊年新開始，大家有冇諗住搵工跳槽呢？中信里昂風水指數話今年旺「金」，連人稱沈大師嘅沈振盈都話金融業前景好光明。不過呢個世界人搵工，工都要搵人，以基金業為例，佢哋想請有穩定表現嘅基金經理（俗稱芬佬），都唔係單睇履歷與往績，有時都要別出心裁諗計。
好似謝清海打骰嘅惠理（806），佢哋二○一一年就拎出一千萬元，跟科技大學合作成立投資研究學術中心，學生要通過面試先至可以選讀入面嘅投資課程。特別之處係學生可以利用惠理提供嘅資金，實戰炒股，以回報計表現分。
方法創新 未算完美
成筆錢點樣分配、賺蝕情況就冇公開，但係惠理就會關注，事關惠理會伺機揀蟀，留意投資表現好嘅同學仔，佢哋或者有機會加入惠理做實習，甚至轉做正式員工㖭。惠理方面無透露請咗幾多呢類同學仔，只係話有人成功加盟。
霸菱資產管理亞太區股票投資董事方偉昌都讚呢個揀蟀嘅方法好創新，但要事先投資咁大筆錢，唔係間間基金公司都願意。佢又話，其實芬佬嘅流動性好大，唔少基金主要透過獵頭公司搵人，亦好樂意從實習學生裏面，揀表現好嘅新員工加入，「一樣係大學生，一樣睇到工作表現，效果其實都差唔多」。
豐盛金融資產管理董事黃國英（Alex）指，惠理嘅方法係唔錯，但唔算完美，因「管理幾百萬同管理幾千萬唔同，管理幾千萬又同管理幾億係兩回事」。話說回頭，Alex形容做呢行絕對唔係易事，除咗基金表現，最大難關係點樣令到客人相信自己，壓力好大。另一位由私人銀行做起嘅基金經理亦都話，見過有同行因為壓力大而成日咬手指，甚至有人因壓力而滿面油光、儀容不整，做芬佬絕對唔係表面咁風光。
話時話，𠵱家有邊份工係冇壓力呢？最緊要保持正能量，祝大家羊年萬事如意。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文